Idman.biz
"Barselona"nın sabiq baş məşqçiləri Luis Enrike və Ernesto Valverde Neqreyra işi üzrə məhkəmədə ifadə veriblər və bildiriblər ki, klub üçün hazırlandığı iddia olunan hakim hesabatlarının mövcudluğundan xəbərləri olmayıb.
İdman.Biz "The Athletic"ə istinadla xəbər verir ki, Enrike məhkəmədə bu cür sənədlərin ona və ya məşqçilər korpusuna heç vaxt təqdim edilmədiyini vurğulayıb.
"Mənim yanımda heç vaxt hansısa hesabatdan danışılmayıb və mənə heç bir hesabat göstərilməyib. Nə mənə, nə də mənim heyətimdən kiməsə. Buna sizi əmin edə bilərəm", - deyə baş məşqçi söyləyib.
Ernesto Valverde də oxşar mövqe sərgiləyərək, məşqçi olduğu dövrdə belə materialların ona təqdim edilmədiyini bildirib.
Bununla belə, klubun prezidenti Joan Laporta həmin hesabatların mövcud olduğunu və "faydalı" sayıldığını iddia edir.
Xatırladaq ki, 2023-cü ildə "Barselona"ya 2001-2018-ci illər arasında İspaniya Futbol Federasiyasının (RFEF) Hakimlər Texniki Komitəsinin (CTA) sabiq vitse-prezidenti Xose Neqreyraya təxminən 8,4 milyon avro (17 milyon AZN) məbləğində ödənişlər etdiyi üçün rüşvət ittihamı irəli sürülüb. Neqreyra isə bu ödənişlərin hakimlərə təsir göstərmək məqsədi daşımadığını bildirərək ittihamları rədd edir.
