Idman.biz
İspaniya millisinin baş məşqçisi Luis de la Fuente Joan Qarsiyanın milliyə dəvət olunmasına münasibət bildirib və Lamin Yamal ilə Dani Karvahal arasında baş verən insidentə də toxunub.
İdman.Biz xəbər verir ki, mütəxəssis gənc qapıçı ilə bağlı danışarkən onu çox yaxşı tanıdığını deyib.
"Joan 21 yaşadək futbolçulardan ibarət yığmada mənimlə birlikdə oynayıb. Nə təklif edə biləcəyini bilirəm və o, bizim iş üslubumuza ideal şəkildə uyğun gəlir", - deyə Luis de la Fuente bildirib.
Mətbuat nümayəndəsinin, "El-Klassiko zamanı Lamin Yamal ilə Karvahal arasında baş verənlər sizi narahat etdimi" sualına isə baş məşqçi belə cavab verib:
"Xeyr. Mənim buradakı rolum komandada sağlam atmosferi qorumaqdır. Hər ikisi ilə danışmışam və bilirəm ki, futbolda belə hallar olur, xüsusən də yüksək rəqabət səviyyəsində. Meydanda baş verənlərlə milli komanda üçün oynamağın məsuliyyətini bir-birindən ayırmaq lazımdır. Onlar bunu başa düşür və görüşəcəkləri anı səbirsizliklə gözləyirlər ki, bir-birlərini qucaqlasınlar".
