Idman.biz
Azərbaycan millisinin UEFA Millətlər Liqasındakı rəqibi Lixtenşteyn yığması qarşıdakı görüşə hazırlığa başlayıb.
İdman.Biz xəbər verir ki, ilk məşq noyabrın 10-da günortadan sonra Ruqqeldəki "Vidau" kompleksində keçirilib.
Bazar günü klublarının çempionat oyunlarında iştirak edən üç futbolçu komanda ilə ümumi məşqə qatılmayıb. Onlar fiziki hazırlıq məşqçisinin rəhbərliyi altında fərdi proqram üzrə çalışıblar.
Bu qərar Azərbaycanla qarşılaşma öncəsi futbolçuların fiziki yükünü tənzimləmək məqsədilə verilib. Digər futbolçular isə komanda məşqində iştirak ediblər.
Xatırladaq ki, Lixtenşteyn millisi Azərbaycanla oyuna kapitanı Nikolas Hasler olmadan hazırlaşır. "Vaduz"un 35 yaşlı futbolçusu "Sion"la qarşılaşmada zədələndiyi üçün yığmanın toplanışına qatıla bilməyib. Onun əvəzinə heyətə 27 yaşlı Manuel Mikus çağırılıb.
Qeyd edək ki, Lixtenşteyn Azərbaycan millisini noyabrın 13-də Vaduzdakı "Reynpark" stadionunda qəbul edəcək. Qarşılaşma Bakı vaxtı ilə saat 23:45-də başlayacaq.
