"Liverpul"un baş məşqçisi Arne Slot Çempionlar Liqasının püşkü və "Qarabağ" barədə danışıb

İngiltərənin "Liverpul" klubunun baş məşqçisi Arne Slot UEFA Çempionlar Liqasının Liqa mərhələsinin püşkünü dəyərləndirib.

İdman.biz Sportnet.az-a istinadən xəbər verir ki, niderlandlı mütəxəssis çox çətin və həyəcanlı püşkün alındığını bildirib.

Onun fikrincə, yeni formatlı Çempionlar Liqasında asan rəqiblər olmur. 47 yaşlı baş məşqçi həm evdə, həm də səfərdə vacib görüşlər keçirəcəklərini diqqətə çatdırıb.

Slot rəqibləri belə dəyərləndirib: "İspaniya "Real Madrid"i ilə doğma "Enfild" stadionunda yenidən görüşmək çox xüsusidir. Ötən mövsümkü matçımız unudulmaz alınmışdı. Eynisini bu dəfə də gözləyirəm. Əminəm ki, bu görüşü bütün dünya izləyəcək. Ardıcıl iki il Niderland çempionu olan PSV-si ilə yenidən oynamağa həmişə şad olaram. Eyni sözləri Türkiyədə ardıcıl 3 kubok qazanan "Qalatasaray" və Azərbaycan çempionu "Qarabağ" barədə demək olar. İtaliya "İnter"i, İspaniya "Atletiko Madrid"i, Almaniya "Ayntraxt Frankfurt"u və Fransa "Olimpik Marsel"i kimi komandalarla da oynayacağıq. Bu isə yarışın gücünü göstərir".

"Liverpul"un baş məşqçisi Çempionlar Liqasında heç bir oyunun onlar üçün asan keçməyəcəyini də vurğulayıb: "Bu, aydın məsələdir. Amma mən əminəm ki, azarkeşlərimiz "Enfild"dəki bütün oyunları, eləcə də fanatik və ehtiraslı azarkeşlər önündə böyük stadionlarda olacaq bütün səfər matçlarını səbirsizliklə gözləyəcəklər. Onlar da bizim kimi ləzzət alacaqlar. Bizi həm yerli oyunlar sarıdan, həm də Avropada sıx qrafik gözləyir. Amma çox həvəsliyik və qarşıdakı çağırışlara hazırıq".

Qeyd edək ki, oyunların təqvimi avqustun 30-da dərc olunacaq.

İdman.biz