Idman.biz
"Liverpul" mərhum hücumçu Dioqo Jotanın ailəsinə portuqaliyalının İngiltərə klubu ilə müqaviləsinin şərtlərinə görə almalı olduğu pulu ödəyəcək.
İdman.biz xəbər verir ki, bu barədə "Record" nəşri məlumat yayıb.
Jotanın ölümü ilə nəticələnən avtomobil qəzası iyulun 3-də baş verib. Futbolçunun qardaşı Andre Silva ilə birlikdə getdiyi "Lamborghini" təkərin partlaması səbəbindən idarəetməni itirərək yoldan çıxaraq xəndəyə uçub və alovlanıb.
Daha əvvəl "Liverpul" portuqaliyalının oynadığı 20 nömrəli köynəyi əbədiləşdirmək niyyətində olduğunu bildirib. Klub həmçinin Jota ilə müqavilənin qalan iki ili üçün məbləği futbolçunun yaxınlarına ödəmək öhdəliyini üzərinə götürmək qərarına gəlib.
Jota 2020-ci ildən "Liverpul"da çıxış edirdi. Bu müddət ərzində o, 182 oyun keçirib, 65 qol vurub və 26 məhsuldar ötürmə verib. "Qırmızılar"ın 2024/25 mövsümündə İngiltərə çempionluğunu qazanmasında onun da böyük zəhməti olub.
İdman.biz
