Idman.biz
Fransa Liqa 1-də 20-ci turun oyunu çərçivəsində "Strasbur" və PSJ komandaları üz-üzə gəlib. Qarşılaşma Paris təmsilçisinin 2:1 hesablı qələbəsi ilə başa çatıb.
İdman.Biz xəbər verir ki, oyunda hesab 23-cü dəqiqədə PSJ-nin yarımmüdafiəçisi Sennı Mayulunun qolu ilə açılıb. Cəmi dörd dəqiqə sonra meydan sahiblərinin müdafiəçisi Gela Due hesabı bərabərləşdirib. Matçın həlledici qolu isə 81-ci dəqiqədə Nunu Mendeş tərəfindən vurulub.
Qarşılaşmanın 74-cü dəqiqəsində PSJ azlıqda qalıb. Müdafiəçi Əşrəf Hakimi birbaşa qırmızı vərəqə alaraq meydandan kənarlaşdırılıb. Buna baxmayaraq, qonaqlar hesab üstünlüyünü qoruya biliblər.
Paris klubunun qapıçısı Matvey Safonov 21-ci dəqiqədə Xoakin Paniçellinin yerinə yetirdiyi penaltini dəf edərək komandasını qoldan xilas edib.
Bu nəticədən sonra PSJ 20 oyundan sonra 48 xalla Fransa çempionatının turnir cədvəlinə başçılıq edir. "Strasbur" isə 30 xalla yeddinci pillədə qərarlaşıb.
Növbəti turda PSJ fevralın 8-də doğma meydanda "Marsel"i qəbul edəcək. "Strasbur" isə həmin gün səfərdə "Havr"la qarşılaşacaq.
01:15
Fransa Liqa 1-də 20-ci turun oyununda "Tuluza" doğma meydanda "Oser"lə qolsuz heç-heçə edib.
İdman.Biz xəbər verir ki, turnir cədvəlinin aşağı pillələrində qərarlaşan "Oser"ə qarşı qalibiyyət qazanmaqla Avropa kubokları zonasına yaxınlaşmaq istəyən "Tuluza" məqsədinə çata bilməyib.
Son beş turda dörd qələbə qazanan və 11 qol vuran "bənövşəyilər" bu görüşdə üstünlüyü ələ alsalar da, yaratdıqları imkanları qola çevirə bilməyiblər.
Bu nəticə ilə "Tuluza" turnir cədvəlində 30 xalla 8-ci yerdə qalıb. Autsayderlər qrupunda yer alan "Oser" isə 13 xalla 17-cidir.
22:38
Fransa Liqa 1-in 20-ci turunda "Nitsa" doğma meydanda "Brest"lə qarşılaşıb.
İdman.Biz xəbər verir ki, qarşılaşma 2:2 hesablı heç-heçə ilə başa çatıb.
Qarşılaşmanın ilk hissəsi qonaqlar üçün uğurlu alınıb. 15-ci dəqiqədə təyin olunan penaltini Romen Del Kastilyo dəqiq yerinə yetirib. Ardınca Kamori Dumbiya hesabı 2:0-a çatdırıb.
İkinci hissədə isə meydan sahibləri geri dönüşə imza atıblar. Əli Abdi 63-cü dəqiqədə baş zərbəsi ilə fərqi azaldıb. 71-ci dəqiqədə isə Elye Vahi təkbətək epizodu dəqiq tamamlayaraq hesabı bərabərləşdirib.
Bu nəticə ilə "Nitsa" 22 xalla 13-cü pilləyə yüksəlib. "Brest" isə 23 xalla 12-cidir.
20:03
Fransa Liqa 1-in 20-ci turunda "Lion" doğma meydanda "Lill"lə qarşılaşıb və 1:0 hesablı qələbə qazanıb.
İdman.Biz xəbər verir ki, matçda yeganə qol 37-ci dəqiqədə "Lion"un yarımmüdafiəçisi Noa Narti tərəfindən vurulub.
Bu nəticədən sonra "Lion" 20 turdan sonra 39 xal toplayaraq turnir cədvəlində dördüncü pillədə qərarlaşıb. "Lill" isə 32 xalla beşinci yerdədir.
