Idman.biz
Fransa Liqa 1-in 24-cü turunun mərkəzi qarşılaşmasında "Marsel" öz meydanında "Lion"u qəbul edib. Gərgin keçən "Olimpik" derbisi meydan sahiblərinin 3:2 hesablı dramatik qələbəsi ilə başa çatıb.
İdman.Biz xəbər verir ki, oyunun debütü qonaqlar üçün uğurlu alınıb. Artıq üçüncü dəqiqədə Korenten Tolisso əks-hücumu dəqiq tamamlayaraq "Lion"u önə keçirib. "Marsel"in cavab qolu ikinci hissənin əvvəlində gəlib; İqor Payşao uzaq məsafədən vurduğu mükəmməl zərbə ilə tarazlığı bərpa edib - 1:1.
Matçın son 15 dəqiqəsi əsl qol şousuna çevrilib. 76-cı dəqiqədə Remi Himbert qonaqları yenidən irəli çıxarsa da (1:2), meydan sahibləri təslim olmayıblar. 81-ci dəqiqədə Pyer-Emerik Obameyanq künc zərbəsindən sonra hesabı bərabərləşdirib. Qarşılaşmaya əlavə olunmuş vaxtda isə İtan Nvanerinin ötürməsini qola çevirən Obameyanq dublunu rəsmiləşdirərək komandasına qələbə qazandırıb.
Bu nəticədən sonra "Lion" üçüncü pillədə qalsa da, "Marsel" onlarla xal fərqini ikiyə endirib.
22:42
Fransa Liqa 1-in 24-cü turu çərçivəsində növbəti qarşılaşmalar baş tutub. Turun oyunları azlıqda qalan komandanın qələbəsi və son dəqiqə qolları ilə yadda qalıb.
İdman.Biz xəbər verir ki, "Brest" səfərdə "Mets"lə qarşılaşmada böyük iradə nümayiş etdirib. Oyunun ilk yarısından etibarən azlıqda qalan qonaqlar buna baxmayaraq, 69-cu dəqiqədə vurduqları qolla minimal hesablı (1:0) qələbə qazanıblar.
Qələbədən sonra "Brest" xallarını 33-ə çatdıraraq doqquzuncu pilləyə yüksəlib. "Mets" isə 13 xalla sonuncudur
"Lill" isə doğma meydanda "Nant"ı qəbul edib. Matç boyunca topa nəzarəti əlində saxlayan meydan sahibləri rəqib qapısına yol tapmaqda çətinlik çəkiblər. Yalnız qarşılaşmaya əlavə olunmuş vaxtda vurulan yeganə qol "Lill"ə çətin qələbəni (1:0) gətirib.
"Lill" bu oyundan sonra xallarını 40-a çatdıraraq beşinci pilləyə yüsəlib. "Nant" 17 xalla autsayderlər sırasındadır.
Günün ən məhsuldar bərabərliyi isə "Loryan" və "Oser" matçında qeydə alınıb. Meydan sahiblərinin heyətində Bamba Dianq dubl edərək komandasını məğlubiyyətdən xilas edib - 2:2.
"Loryan" qazandığı bir xallarını 33-ə çatdırıb və 10-cu pillədəki yerini qoruyub. "Oser" 18 xalla 16-cıdır.
20:36
Fransa Liqa 1-in 24-cü turu çərçivəsində keçirilən "Paris" - "Nitsa" matçı meydan sahiblərinin 1:0 hesablı qələbəsi ilə başa çatıb.
İdman.Biz xəbər verir ki, oyunun taleyini həll edən yeganə qol 27-ci dəqiqədə vurulub. "Paris"in yarımmüdafiəçisi Marşall Munetsi rəqib qapısına yol taparaq komandasına vacib üç xal qazandırıb.
Bu qələbədən sonra "Paris" xallarını 26-ya çatdıraraq turnir cədvəlinin 14-cü pilləsində qərarlaşıb. "Nitsa" isə 24 xalla 15-ci sırada yer alıb.
Növbəti turda, martın 8-də "Nitsa" öz meydanında "Renn"i qəbul edəcək. "Paris" isə həmin gün səfərdə "Lion"un qonağı olacaq.
