“Lion”un dünəni və bu günü

"Qarabağ"ın bu gün qarşılaşacağı Avropa Liqası Liqa mərhələsindəki 5-ci rəqibi 74 yaşı Fransa təmsilçisi "Lion"dur.

İdman.biz rəqibimizin dünəninə və bu gününə qısa nəzər salıb.

Klub 1954-cü il avqustun 3-də yaradılıb. Hələ 60-cı illərdə Fransa kubokunda qələbələri, finalları olan klub Liqa1-in 1989-cu ildən daimi iştirakçısıdır. Komandanın çempionat uğurları 21-ci əsrdə gəlməyə başlayıb. Əsrimizin ən titullu fransız klubu elə yüzilliyin başlanğıcından – 2001-2002-ci illər mövsümündən etibarən 7 il dalbadal ölkə çempionu olub və bununla da həmin titula sahiblənməyə son qoyub.

Yeddiqat Fransa çempionu, beşqat vitse-çempion, Fransa Liqası kubokunu qazanıb, ölkə kubokunun beşqat, superkubokunun səkkizqat sahibi beynəlxalq arenada iki dəfə Çempionlar Liqasının (2010, 2020), 1 dəfə Avropa Liqasının (2017), 1 dəfə Kuboklar Kubokunun (1964) yarımfinalçısı, 1997-ci ildə isə İntertoto kubokunun qalibi olub.

Komandanın son nəzərəçarpacaq nəticəsi bu il ölkə kubokunun finalında oynamasıdır.

Liqa1-də sonuncu dəfə mükafatçılar pilləsində 2018/2019 mövsümündə üçüncülük qazanan klub ötən mövsüm çempionatı 6-cı pillədə başa vurub. Elə indi də 12 turdan sonra 19 xalla 6-cı pillədədir.

Ötən mövsümdə komandanın bombardiri 19 qolla Aleksandr Lakazett olduğu halda, həmin dövrdə cəmi 3 qol vurmuş Malik Fofana cari mövsümün 12 oyununda elə həmin sayda – 3 qolla "Lion"un ən məhsuldar oyunçusudur. Lakazett isə iştirak etdiyi 12 oyunda cəmi 1 qol vurub.

Qitədə 5 mövsümdür Çempionlar Liqasının yolunu unudan "Lion" son 2 mövsümdə ümumiyyətlə avrokuboklardan kənar qalıb.

Cari Avropa Liqasında birbaşa Liqa mərhələsinə Yunanıstan "Olimpiakos"u (2:0), Şotlandiya "Reyncers"i (4:1) üzərində qələbə ilə başlayıb. Ardından Türkiyə "Beşiktaş"ına evdə 0:1 hesabı ilə uduzan Fransa klubu son turda "Hoffenhaym"la xalı bölüb (2:2). Hazırda 7 xalla Avropa Liqası Liqa mərhələsində turnir cədvəlinin 9-cu pillədə qərarlaşan "Lion"un 8 qolundan 3-nü Lakazett, 2-sini Fofana vurub.

Göründüyü kimi əsrin əvvəlindəki gücünü artıq saxlamayan, lakin yenə də qitənin sayılan komandalarından hesab edilən "Lion" bu gün Bakıda saat 21:45-də "Qarabağ"la matça çıxacaq.

Vüqar Məmmədov
İdman.biz