Sport24.az
Konfrans Liqasının III təsnifat mərhələsində "Sabah"ı rəqibi olan "Levski"nin baş direktoru Daniel Borimirov komandalar arasında keçiriləcək cavab matçı ərəfəsində mətbuata açıqlama verib. Sport24.az xəbər verir ki, "Tema Sport"a danışan klub rəsmisi komandasının "Sabah"la cavab görüşündən sərfəli nəticə ilə ayrılacağına inandığını bildirib:
"Düşünürəm ki, qarşıdakı oyuna yaxşı hazırlaşmışıq və ümid edirəm sabahkı matçda taktiki cəhətdən çox düzgün oynayıb, istədiyimizə nail olacağıq. Heç bir oyun oxşar deyil. Ona görə də bizim üçün ən vacibi məşqçinin futbolçularımıza verdiyi tapşırıqların düzgün yerinə yetirilməsidir. Fikrimcə, biz buna nail olacağıq".
Borimirov hücumçu Mustafa Sanqarenin yoxluğuna da toxunub: "O, fiziki cəhətdən çox hazırlıqlı futbolçudur. Öz oyunu ilə ən azından "Sabah"ın iki oyunçusunu özünə cəlb edəcəkdi. Bununla belə, inanıram ki, baş məşqçi Velaskes "Sabah"ı yaxşı analiz edib və düzgün qərar verəcək".
Borimirov əlavə edib ki, Bakıda qeydə alınacaq müsbət nəticə yalnız "Levski"nin irəliləməsi üçün deyil, ümumilikdə Bolqarıstan futbolu üçün faydalıdır: "Ümid edirəm biz bunu bacaracağıq. Bolqarıstan futbolunun hansı səviyyədə olduğunu görürsünüz və biz yuxudan oyanıb pilləkənlə qalxmağa başlamalıyıq".
Qeyd edək ki, "Sabah" Sofiyada keçirilən ilk matçda "Levski"yə 0:1 hesabı ilə uduzub. Cavab oyunu avqustun 14-də Bakıda olacaq.
