Idman.biz
"Azərbaycan futbolu ötən illə müqayisədə inkişaf edib. Legioner limitinin ləğvi bunun əsas səbəblərindən biridir".
Bunu "Zirə"nin futbolçusu Leroy Mikels AZƏRTAC-a müsahibəsində deyib.
Həmin müsahibəni təqdim edirik:
- Azərbaycanda ikinci mövsümü keçirirsiniz. Ölkə futbolunu necə qiymətləndirirsiniz?
- Azərbaycan futbolu ötən illə müqayisədə inkişaf edib. Legioner limitinin ləğvi bunun əsas səbəblərindən biridir. Limitin aradan qaldırılması meydanda keyfiyyətin artmasına gətirib çıxarıb. Bunu turnir cədvəlindən də görmək olur. Komandalar bir-birinə yaxın pillələrdə qərarlaşıblar və artıq liqada asan oyun qalmayıb.
- "Zirə"nin bu mövsüm Misli Premyer Liqa və Bizon Azərbaycan Kubokundakı hədəfləri nələrdir?
- Hədəflərimiz yüksəkdir. Yaxşı formamızı mümkün qədər uzun müddət qorumaq və mövsümün sonunda həm liqada, həm də kubokda zirvə uğrunda mübarizədə qalmaq istəyirik.
- Qardaşlarınız – Coy-Lens və Coy-Slayd da Azərbaycan çempionatında çıxış edir. Onlara qarşı oynamaq necə hissdir? Ümumiyyətlə, oyunlardan sonra görüşürsünüzmü?
- Qardaşlarıma qarşı oynamaq çox xüsusi hissdir. Bu imkana görə özümüzü şanslı hiss edirik. Belə oyunlar bir az daha şəxsi xarakter daşıdığı üçün qələbə qazanmaq istəyi daha çox olur. "Sabah"da çıxış edən Coy-Lenslə daha tez-tez görüşürəm, çünki hər ikimiz Bakıda yaşayırıq. "Karvan-Yevlax"ın formasını geyinən Coy Slaydla isə bu imkandan yararlanmaq çətindir. Çünki burada yaşamır. Onu adətən həftəsonları görürəm.
- Maraqlıdır, qardaşlar arasında ən istedadlısı hansıdır?
- Bu suala konkret cavab verə bilmərəm. Oyun üslublarımız müəyyən qədər oxşasa da, əslində fərqli xüsusiyyətlərimiz var. Bu, bir növ zövq məsələsidir.
- Növbəti turda sabiq komandanız "Şamaxı"ya qarşı oynayacaqsınız. Bu görüşün sizin üçün prinsipiallığı var?
- Köhnə dostlarımı görəcəyim üçün sevinirəm. Biz hər oyuna yalnız qələbə üçün çıxırıq.
