Idman.biz
ABŞ, Meksika və Kanadanın birgə ev sahibliyi edəcəyi 2026 Dünya Çempionatının rəsmi mahnısı ilə bağlı ortaya maraqlı iddia atılıb.
İdman.Biz xəbər verir ki, ABŞ-li müğənni Ledi Qaqa və kanadalı müğənni Abel Makkonen Tesfaye (Uikend) DÇ-2026-nın rəsmi mahnısı üçün mümkün əməkdaşlıqla bağlı şayiələrin mərkəzindədir.
Yayılan məlumatlara görə, bu iki dünya ulduzu turnirin açılış atmosferini canlandırmaq üçün bir araya gələ bilər.
Qeyd edək ki, DÇ-2026 11 iyun tarixində Meksikanın "Estadio Azteka" stadionunda Meksika və Cənubi Afrika milli komandaları arasında keçiriləcək açılış oyunu ilə start götürəcək.
DÇ-2026-nın başlamasına altı aydan az vaxt qalmış FIFA-nın rəsmi turnir mahnısı ilə bağlı yayılan şayiələr ciddi rezonans doğurub.
Hələlik nə FIFA, nə də sənətçilərin özləri tərəfindən rəsmi açıqlama verilməyib. Lakin 2025-ci ilin dekabrında Uikendin sosial şəbəkədə etdiyi paylaşım bu şayiələri daha da gücləndirib.
Kanadalı müğənni bütün paylaşımlarını "Instagram" hesabından silib və yalnız Ledi Qaqanın köhnə fotosunu "Story" bölməsində paylaşıb. Həmin foto Ledi Qaqanın "The Fame" albomu dövrünə aiddir və orada o, üzərində "LADYGAGA" nömrə nişanı olan qara "Leksus" avtomobilinin qarşısında görünür.
Ledi Qaqa isə daha sonra verdiyi müsahibədə belə deyib:
"Mən Abeli çox sevirəm, deyəcəyim tək şey budur. Mən onun böyük fanatıyam".
Bu sözlər azarkeşlər arasında söz-söhbətləri daha da artırıb.
