Idman.biz
"Çempionatın bombardiri olmaq məni sevindirən bir nailiyyətdir".
Bunu İdman.biz-ə "Qarabağ"ın futbolçusu Leandro Andrade deyib.
Misli Premyer Liqasında 2024/25 mövsümündə çempionatın bombardiri olan yarımmüdafiəçi fikirlərini bölüşüb. O bildirib ki, uğurlarını davam etdirmək üçün əlindən gələni edəcək: "İlk dəfədir ki, bir turnirdə ən çox qol vuran oyunçu oldum. Əsas məqsədim hər mövsüm sağlam qalmaq və bütün oyunlarda iştirak etməkdir. Çünki yaxşı bilirəm ki, əgər çox oyun oynasam və meydandakı roluma tam şəkildə fokuslansam, bir futbolçu kimi inkişaf edəcəm, qol vurmaq üçün imkanlar əldə edəcəm. Bu mövsüm də məhz belə oldu".
Mövsüm ərzində 15 qol vuran 26 yaşlı portuqaliyalı yarımmüdafiəçi nəticəsindən razı deyil: "Komanda yoldaşlarımın dəstəyi və baş məşqçinin mənə verdiyi imkanlar bu fərdi nailiyyətin mümkün olmasına səbəb oldu. Sevincliyəm, amma tam razı deyiləm. İnanıram ki, daha yaxşısını edə bilərəm. Çünki bu mövsüm liqada 15 qoldan daha çox vurmaq üçün imkanlarım var idi".
Qeyd edək ki, Andrade 2022-ci ilin yanvarından komandanın formasını geyinir. Yarımmüdafiəçinin "Qarabağ"la müqaviləsinin müddəti 2027-ci il iyununa qədərdir.
Aytac Sahəd
İdman.biz
