Idman.biz
"Barselona"nın 18 yaşlı hücumçusu Lamin Yamal sentyabrın 22-də Parisdəki Şatle Teatrında keçiriləcək "Qızıl top"un təqdimetmə mərasimi öncəsi öz istəklərindən danışıb.
İdman.biz -in məlumatına görə, gənc istedad komanda yoldaşları Pedri, Robert Levandovski və Rafinya ilə birlikdə namizəd olduğu mükafatı qazanmağa "ümid etdiyini" etiraf edib.
Yamal ötən mövsüm 55 matçda 18 qol vurub, 25 məhsuldar ötürmə edib. O, La Liqanın ilk üç turunda 5 qol vuraraq yeni mövsümə eyni dərəcədə parlaq başlayıb.
"18 yaşında namizəd olmaq təqdir edilməli bir şeydir. Hər bir futbolçu "Qızıl top"u arzulayır və ümid edirəm ki, bu baş verəcək. Amma hər şeydən əvvəl "Barselona" ilə Çempionlar Liqasını qazanmaq bütün komanda üçün inanılmaz məqsəddir", - Yamal RTVE-yə müsahibəsində deyib.
Forvard növbəti oyunlarını İspaniya millisinin heyətində mundialın seçmə mərhələsi çərçivəsində sentyabrın 4-də Bolqarıstan, 7-də Türkiyəyə qarşı keçirəcək.
İdman.biz
