La Liqanın 94-cü mövsümü STARTDA

Bu gün İspaniya La Liqasının 94-cü mövsümünə start veriləcək.

İdman.biz xəbər verir ki, ölkə çempionatın ilk oyun günündə "Atletik" – "Xetafe" və "Betis" – "Jirona" matçları keçirləcək.

1928/1929-cu illərdə ilk turnirdə iştirak etmiş 12 komandadan 6-si bu mövsümdə də mübarizəyə qatılacaq. Onlardan ilk çempionatda fəxri kürsüyə bu ardıcıllıqla qalxmış "Barselona", "Real" və "Atletik" fasiləsiz bütün mövsümlərdə iştirak ediblər. "Espanyol" (88 mövsümdə iştirak edib), Madrid "Atletiko"su (87) və "Real Sosyedad"ın (77) iştiraklarında isə fasilələr olub.

İspaniya çempionu adını indiyədək cəmi 9 komanda qazanıb. Ən çox qalib adına "Real" (36) və "Barselona" (27) layiq görülüb. Son çempion Madrid təmsilçisidir.

La Liqanın ən yaşlı oyunçuları "Rayo Vakyekano"dadır (orta yaş – 27,86). Ən gənc heyətə isə "Barselona" (22,89) malikdir.

20 klubdan yalnız 5-ni xarici mütəxəssis çalışdırır. Ən yaşlı məşqçi "Betis"in "sükanı arxası"nda olan 71 yaşlı çilili mütəxəssis Manuel Pelleqrini, ən cavanı isə "Selta"nın 36 yaşlı ispaniyalı mütəxəssisi Klaudio Xiraldesdir.

I tur
15 avqust
"Atletik" – "Xetafe"
"Betis" – "Jirona"
16 avqust
"Selta" – "Alaves"
"Las Palmas" – "Sevilya"
17 avqust
"Osasuna" – "Leqanes"
"Valensiya" – "Barselona"
18 avqust
"Real Sosyedad" – "Rayo Valyekano"
"Malyorka" – "Real" Madrid
19 avqust
"Valyadolid" – "Espanyol"
"Vilyarreal" – "Atletiko"

Vüqar Məmmədov
İdman.biz