La Liqa prezidenti "Barselona" məlumatlarını açıqladığı üçün vəzifəsindən kənarlaşdırıla bilər

İspaniya La Liqasının prezidenti Xavyer Tebasın diskvalifikasiya olunması və ya vəzifəsindən kənarlaşdırılması təhlükəsi yaranıb. Səbəb "Barselona" futbol klubuna aid məxfi maliyyə məlumatlarının açıqlanmasıdır.

Lent.az xarici mediaya istinadla bildirir ki, məlumata görə, 21 noyabr, cümə günü İspaniyanın İdman Administrativ Tribunalı (TAD) Tebas barəsində iş açıb. İttiham "La Liqanın rəsmi saytında 2 aprel 2025-ci il tarixli açıqlama vasitəsilə, klubların büdcə tərtibi qaydalarına uyğun olaraq "Barselona" tərəfindən təqdim edilmiş məlumatların və göstəricilərin ictimai şəkildə açıqlanması" ilə bağlıdır. Qaydalara əsasən, bu cür məlumatlar məxfi hesab olunur və məlumatların qorunması haqqında qanuna tabedir.

İşin əsas səbəbi "Barselona"nın ötən mövsümdə yaşadığı maliyyə problemləridir. O zaman katalon klubu 2024-cü ilin yayında "Leypsiq"dən 55 milyon avroya transfer etdiyi Dani Olmonun qeydiyyatında çətinliklərlə üzləşmişdi. La Liqa daha əvvəl "Kamp Nou" stadionundakı VIP-loca satışları ilə bağlı problemlərə görə klubda maliyyə uyğunsuzluqları olduğunu açıqlamışdı. Liqanın yeni audit yoxlaması "Barselona"nın satılmamış VIP yerlərindən əldə olunmamış 100 milyon avroluq gəliri hesabatlara qanunsuz şəkildə daxil etdiyini aşkar etmişdi. Bu isə liqanı əvvəllər futbolçu qeydiyyatına imkan verən həmin sövdələşməni ləğv etmək niyyətinə gətirib çıxarmışdı.

"Barselona" Xavyer Tebası məxfilik qaydalarını pozmaqda ittiham edib. Bu açıqlamadan sonra La Liqa həmin məlumatı öz rəsmi saytından və digər platformalardan silib. Əgər TAD Tebası günahkar hesab edərsə, onu ictimai töhmətdən başlayaraq 2 aydan 1 ilədək diskvalifikasiya və ya vəzifədən kənarlaşdırma kimi cəzalar gözləyir.