La Liqa 12-ci tur: "Mərakeş"i başqa yerdə çəkin deyərək, "Real Madrid" Valensiya səfərində, liderlik uğrunda isə "Barselona" ilə "Atletiko" mübarizəsində

İspaniya La Liqasında 2026/2027 mövsümünün onikinci turuna bu gün start veriləcək. Qarşıdakı oyunlar çempionluq mübarizəsində komandaların mövqeyinə ciddi təsir göstərə bilər.

İdman.Biz xəbər verir ki, 11 turdan sonra turnir cədvəlinə 30 xalla "Barselona" başçılıq edir. Kataloniya təmsilçisindən iki xal geri qalan Madrid "Atletiko"su ikinci, daha bir xal geridə olan "Real" isə üçüncü pillədə qərarlaşıb. Dördüncü yerdə 23 xalla "Betis"dir. "Real Sosyedad" (19) və "Sevilya" (17) da ilk altılıqda yer alıblar.

Turun əsas qarşılaşması Madriddə iki lider arasında keçiriləcək. Bununla yanaşı, "Real"ın "Valensiya" səfəri də böyük maraq doğurur. Joze Mourinyonun komandası burada xal itirəcəyi təqdirdə çempionluq mübarizəsində vəziyyətini çətinləşdirə bilər.

"Sevilya" – "Alaves"

Tur "Ramon Sançes Pisxuan" stadionunda keçiriləcək qarşılaşma ilə açılacaq. Çempionatın altıncı pilləsindəki "Sevilya" 12 xalla 11-ci yerdə olan "Alaves"i qəbul edəcək.

Luis Qarsiya Plasanın rəhbərlik etdiyi "Sevilya" 17 xal toplayıb. Lakin komanda ötən turda hesabı açmasına baxmayaraq, "Xetafe"yə 1:3 hesabı ilə məğlub olub. İndi Əndəlüs təmsilçisi azarkeşləri önündə qələbə qazanaraq avrokuboklara vəsiqə uğrunda mübarizədə mövqeyini möhkəmləndirmək niyyətindədir.

Qarşılaşma öncəsi meydan sahiblərinin heyətində itkilər var. Pekke Fernandes zədə, Manu Bueno isə cəza səbəbindən oynaya bilməyəcək. Dizində problem yaşayan İsaak Romero isə yenidən heyətə qayıdıb.

"Alaves" də matça yaxşı əhval-ruhiyyədə gəlmir. Kike Sançes Floresin komandası son yeddi turda qələbə qazana bilməyib. Ötən turda isə "Barselona"ya 1:6 hesabı ilə uduzub. Qonaqlar uğursuz seriyanı dayandırmağa çalışacaqlar. Lakin Fakundo Qarses və Mikel Rodriges zədə səbəbindən meydana çıxa bilməyəcəklər.

Qarşılaşmaya əlavə maraq qatan məqamlardan biri də Luis Qarsiya Plasanın sabiq komandası ilə görüşüdür. "Sevilya"nın hazırkı baş məşqçisi əvvəllər "Alaves"ə rəhbərlik edib və Vitoriya təmsilçisinin oyun üslubuna yaxından bələddir.

"Valensiya" – "Real Madrid"

Madrid "Real"ı çempionluq yarışında növbəti vacib sınaqdan "Mestalya" stadionunda keçəcək. Joze Mourinyonun komandası 27 xalla üçüncü yerdədir. "Valensiya" isə cəmi 9 xalla turnir cədvəlinin 19-cu pilləsində qərarlaşıb.

Komandaların turnir cədvəlindəki mövqeləri arasında ciddi fərq olsa da, Madrid təmsilçisini çətin səfər gözləyir. "Valensiya" ötən turda "Elçe"ni səfərdə 1:0 hesabı ilə məğlub edib. Yeganə qolu zədədən sonra meydana qayıdan Umar Sadik vurub. Bu, Xavyer Aqirrenin rəhbərliyi altında komandanın ilk qələbəsi olub.

Bununla belə, Valensiya klubunun vəziyyəti hələ də ürəkaçan deyil. Komanda 11 oyunda cəmi səkkiz qol vurub və cari çempionatda öz meydanında hələ qələbə qazanmayıb.

"Real" isə son vaxtlar yaxşı formada çıxış edir. Madridlilər ötən turda "Rasinq"i 3:0 hesabı ilə məğlub edib, daha sonra Çempionlar Liqasında Yunanıstan AEK-ini 3:2 hesabı ilə üstələyiblər. Komandanın bütün turnirlərdə qələbə seriyası yeddi matça çatıb.

Qeyd edək ki, Mourinyo Valensiyaya səfər öncəsi rəqibin turnir cədvəlindəki mövqeyinə baxmayaraq, qarşıdakı oyunu çempionatın ən çətin görüşlərindən biri hesab etdiyini bildirib.

Madridlilərə Vinisius Junior kömək edə bilməyəcək. Braziliyalı futbolçu diskvalifikasiya cəzasını çəkməyə davam edir. Rodriqo və Raul Asensio da zədə səbəbindən meydana çıxa bilməyəcəklər. Bununla belə, avrokubok matçında dincələn Orelyen Tçuameni qarşılaşmaya hazırdır.

Qələbə "Real"ın xalını 30-a çatdıracaq və komanda ən azı müvəqqəti olaraq "Barselona" ilə eyni xala sahib olacaq. Kataloniyalılar isə bir gün sonra meydana çıxacaqlar.

"Atletiko Madrid" – "Barselona"

Turun mərkəzi qarşılaşması "Metropolitano" stadionunda keçiriləcək. Burada çempionatın ilk iki pilləsində qərarlaşan komandalar üz-üzə gələcəklər.

"Barselona" 30 xalla liderdir, "Atletiko" isə ondan cəmi iki xal geri qalır. Qələbə Dieqo Simeonenin komandasına rəqibini qabaqlamaq və millilərin oyunları ilə əlaqədar noyabr fasiləsinə lider kimi yollanmaq imkanı verəcək.

"Atletiko" qarşılaşmaya əla formada hazırlaşır. Madrid təmsilçisi La Liqada son yeddi oyununu qələbə ilə başa vurub. Ötən turda səfərdə "Levante"ni 2:0 hesabı ilə məğlub edən Simeonenin komandası həm də çempionatın ən etibarlı müdafiəsinə malikdir. "Atletiko" 11 oyunda cəmi səkkiz qol buraxıb.

"Barselona" isə La Liqanın ən məhsuldar hücum xəttinə sahibdir. Kataloniyalılar 11 qarşılaşmada 46 qol vurublar. Hansi-Diter Flikin komandası ötən turda "Alaves"i 6:1 hesabı ilə darmadağın edib, daha sonra Çempionlar Liqasında İngiltərənin "Aston Villa" klubunu 3:0 hesabı ilə məğlub edib.

Qarşılaşmanın əsas qəhrəmanlarından biri Rafinya ola bilər. Braziliyalı futbolçu 15 qolla La Liqanın bombardirlər yarışına başçılıq edir. Bununla belə, zədələr kataloniyalıların hazırlığını çətinləşdirir. Arxa bud əzələsindəki problem səbəbindən yarımmüdafiəçi Rodri matçı buraxacaq. Komandanın müdafiə xəttində də itkilər var.

Rəqiblərin son mövsümdəki qarşılaşmaları da maraq doğurur. "Barselona" ötən çempionatda hər iki oyunda qalib gəlib – evdə 3:1, səfərdə isə 2:1. Bununla belə, kubok turnirlərində üstünlük "Atletiko"da olub. Madrid klubu kataloniyalıları Çempionlar Liqasının 1/4 finalında, İspaniya Kubokunun isə yarımfinalında mübarizədən kənarlaşdırıb.

Beləliklə, bazar günü keçiriləcək görüş "Atletiko" üçün həm liderliyi ələ keçirmək, həm də ötən çempionatda aldığı iki məğlubiyyətin əvəzini çıxmaq baxımından əhəmiyyətlidir. "Barselona" isə qələbə qazanacağı təqdirdə ən yaxın izləyicisi ilə xal fərqini beşə çatdıracaq.

La Liqanın XII turunun təqvimi, Bakı vaxtı ilə

6 noyabr, cümə

23:59. "Sevilya" - "Alaves"

7 noyabr, şənbə

17:00. "Malaqa" – "Rasinq"

19:15. "Espanyol" – "Deportivo"

21:30. "Osasuna" – "Atletik"

23:59. "Valensiya" – "Real Madrid"

8 noyabr, bazar

17:00. "Elçe" – "Betis"

19:15. "Real Sosyedad" – "Rayo Valyekano"

21:30. "Selta" – "Levante"