Sport24.az
Konfrans Liqasının III təsnifat mərhələsində sabah keçiriləcək "Sabah" - "Sent Patriks" oyunundan öncə "bayquşlar"ın baş məşqçisi Krunoslav Renduliç jurnalistlərin suallarını cavablandırdı. Sport24.az xəbər verir ki, mütəxəssis əvvəlcə görüşlə bağlı fikirlərini bildirdi.
- Birinci oyundan sonra geridəyik. Oyun ağır olacaq. Buna baxmayaraq, hər iki komandanın şansı var. Şanslarımızdan istifadə etməyə çalışacağıq. Oyuna hazırıq. Bəzi itkilərimiz var, amma çalışacağıq ki, problemlərin həllini tapaq.
- Səfərdə gözləniləndən zəif təsir bağışladınız. Sabah rəqibə hansı sürprizi və planı hazırlamısız? Və əminsinizmi ki, bu plan alınacaq?
- Müəyyən hissədə sizinlə razıyam. İstədiyimiz oyunu sərgiləyə bilmədik. İkinci yarıda azlıqda qalandan sonra möhtəşəm oyun göstərə bilməzdik. Faktdır ki, 0:1 hesabıyla uduzmuşuq. Bir fakt da odur ki, şanslar bərabərdir.
- Müdafiə xəttiniz son üç oyunda pis təsir bağışlayır. Müdafiəni gücləndirmək üçün resept var?
- Resept çox sadədir. Hər kəs müdafiəyə kömək olmalıdır. Avropada asan rəqib yoxdur. Hücumçun müdafiəyə kömək etməyəcəksə, çətin olacaq.
- "Makkabi" ilə uğurlu oyundan sonra yaranan tendensiya maraqlıdır...
- Öncə onu deyim ki, futbolda belə hallar olur. "Makkabi"yə qarşı oyunumuz 3 saat çəkdi. 72 saat keçməmiş "Şamaxı" ilə oynadıq, həm də saat 17:30-da. Bu bəhanə deyil. Amma zədəlilərimiz var idi. "Şamaxı" iki zərbə vurdu və hər biri qol oldu. Bu oyundan üç xal gözləyirdik, olmadı. "Zirə" ilə matçda isə penaltiyə qədər bərabər oynayırdıq. Amma penalti bütün matçın taleyini həll etdi. Məğlubiyyət olanda bəzi şeylər pis olur. Amma hər zaman yaxşıya baxmağa üstünlük verirəm. Mənə görə oyunçularımızın yanaşması çox yaxşı idi.
- Ötən mövsüm də "Partizan"la oyunda yaxşı nəticədən sonra məğlubiyyət oldu və komanda çempionatda eniş yaşadı. İndi də sanki eyni situasiyadır. Hansısa həll yolunuz var?
- Gənc klubuq. Belə proseslər normaldır. Ardıcıl avrokuboklara vəsiqə qazanmaq bizim kimi klub üçün yaxşı nəticədir. Onu da nəzərə almalıyıq ki, 7 günə 2 oyun oynamaq bizim üçün çətindir. Əlavə vaxtlar, uzun səfərlər və s. Bunlar hamısı oyunlara təsir edir.
- Gənc klub olsanız da, ötən mövsüm bu təcrübəni yaşamısınız. Bundan dərs çıxarılıb?
- Ötən il ötən ildə qaldı. Müqayisə etməyək.
- Rəqib ilk görüşdə "ağır" təsir bağışladı. "Sabah" ilk oyunda bundan istifadə edə bilmədi. Bəs sabah necə?
- Yalnız onu deyə bilərəm ki, sabah birinci saniyədən hücumu düşünəcəyik.
