Sport24.az
Misli Premyer Liqasının VII turu çərçivəsində keçirilən "Səbail" - "Sabah" matçından sonra təşkil olunan mətbuat konfransında qonaqların baş məşqçisi Krunoslav Renduliç jurnalistlərin suallarını cavablandırıb. Sport24.az xəbər verir ki, "bayquşlar"ın çalışdırıcısı əvvəlcə oyunla bağlı fikirlərini bölüşüb.
- Biz bura xal götürməyə gəlmişdik. Buna görə oyunçularımı təbrik edirəm. Futbolçularım yaxşı oynadı. Amma mükəmməl oynadığımızı deyə bilmərəm. Çünki yenə qapımızda iki qol gördük. Buna görə də məmnun deyiləm. Hücum xəttinin oyununa görə razıyam. Bilirdik ki, bizim üçün burda çətin olacaq. Sonuncu qələbəmizi iki il öncə əldə etmişik. "Səbail" yaxşı oynadı. Amma biz daha yaxşı idik.
- Böyük üstünlüyünüz var idi. Niyə oyun birdən-birə bu qədər çətin oldu?
- Müdafiədə səbirli oynamalıyıq. Hər vəziyyətə 100 faiz yanaşmaq lazımdır. Bu sadəcə keyfiyyətdən asılı olan məsələ deyil. Hər vəziyyətə yuxarıdan aşağı baxmaq lazım deyil, daha diqqətli oynamaq lazımdır. Bunu oyundan qabaq da demişdim. Müdafiədə daha məsuliyyətli olmalıyıq.
- Birinci hissədə qolunuz ləğv olunanda Şahin Diniyev sizin ehtiyat skamyaya yaxınlaşdı. Sizə nə dedi?
- Xüsusi şey demədi. Sadəcə, dedi ki, orda qayda pozuntusu var idi.
- Oyunlar zamanı çox sarı və qırmızı vərəqələrlə cəzalandırılırsız. Bunu normal hesab edirsiz?
- Bu normal deyil. Amma futbolda bəzən belə hallar baş verir. Hansısa epizoda çatmırsan, cəzalanırsan. Oyunun başlanğıcında bəzi sarı vərəqələri qəbul edərəm. Amma hakimə şikayət edib, vərəqə almağı qəbul etmirəm.
- Bu gün matç heç-heçə bitsəydi, uğur sayılacaqdı?
- Bir xaldan məmnun olmazdım. Çünki oyun başlayandan qələbəyə daha yaxın idik. Hələ VAR iki qolumuzu ləğv etdi.
- Hər qələbə sizi çempionluğa yaxınlaşdırır, yoxsa "Qarabağ"ın olduğu yerdə çempionluq mümkün deyil?
- "Qarabağ" çox böyük keyfiyyətə malikdir. Bu faktdır. Biz oyundan-oyuna irəliləyirik. Heç vaxt nə baş verəcəyini deyə bilmərik. Gələcəkdə nə olacaı barədə çox da fikirləşmirik. Sabahdan "Qarabağ"la oyuna hazırlaşacağıq. Çünki onlar növbəti rəqibimizdir.
