İdman.biz
"Oyuna çox pis başladıq. Demək olar ki, ilk 15 dəqiqədə 2 qol buraxdıq".
İdman.biz xəbər verir ki, bunu "Sabah"ın baş məşqçisi Krunoslav Renduliç deyib.
Xorvatiyalı mütəxəssis Azərbaycan Premyer Liqasının V turunda "Kəpəz"ə qalib gəldikləri oyunu şərh edib: "Nəyisə 100 faiz istəmirsənsə, nəticələr belə alınır. Həyatda da belədir. Rəqibin 2-ci qolundan sonra istədiyimiz kimi oynamağa başladıq. İkinci hissədə mükəmməl idik, 3 qol vurduq. Daha 3 qol vura bilərdik. İki fərqli hissə oldu. İlk yarıda çox bərbad, ikinci hissədə mükəmməl oyun sərgilədik. Bu gün 3 xala layiq idik. Bilirdik rəqib necə oynayacaq. Buna qarşı hazırlaşmışdıq. Meydanda hər situasiyaya düzgün yanaşmaq lazımdır. Futbolçu gözləyir ki, komanda yoldaşım mənim yerimə hərəkət edəcək. Buna görə də 2 qol buraxdıq. Amma vaxtında başa düşdük ki, davranışımızı dəyişməliyik. Qarşıdakı matça belə yanaşsaq, qalib gələ bilməyəcəyik. Bu, bizim üçün yaxşı dərs oldu".
Qeyd edək ki, hesabda 0:2 geri düşən "Sabah" fasilədən sonra 3 qol vuraraq, əzmkar qələbə qazanıb.
İdman.biz
