Idman.biz
"Bavariya"nın idman direktoru Kristof Froynd komandanın Bundesliqanın 10-cu turunda "Union"a qarşı oyunundan əvvəl baş məşqçi Vensan Kompani haqqında danışıb.
İdman.Biz xəbər verir ki, oyun noyabrın 8-də Berlində keçiriləcək.
"Onun fantastik xarakteri var, möhtəşəm insandır. Onunla danışmaq, mövzuları müzakirə etmək və onu dinləmək həmişə xoşdur. O, futbol və ümumiyyətlə həyat haqqında çox düşünən ağıllı bir insandır. Ona görə də onun bizimlə olması xüsusi bir amildir.
O, klub üçün müstəsna məşqçidir. Mən onun həqiqətən də "Bavariya" üçün mükəmməl məşqçi olduğuna ürəkdən inanıram. Əgər o, "Bavariya"da uzun müddət qalsaydı, çox xoşbəxt olardım. O, lazım olan hər şeyə sahibdir", - Froynd "Sky Sport Germany"yə verdiyi müsahibədə deyib.
Almaniya liqasında doqquz oyundan sonra "Bavariya" turnir cədvəlinə 27 xalla başçılıq edir. Komanda həmçinin dörd oyundan sonra 12 xalla Çempionlar Liqasında da liderdir.
