Idman.biz
Portuqaliya millisinin futbolçusu Kriştianu Ronaldunun yığma komandadakı karyerasını başa vurmaq qərarının yeni təfərrüatları üzə çıxıb.
İdman.Biz "A Bola" nəşrinə istinadən xəbər verir ki, 41 yaşlı hücumçu qərarını sosial şəbəkələrdə elan etməzdən əvvəl Portuqaliya Futbol Federasiyasının prezidenti Pedro Proensanı məlumatlandırıb. Lakin millinin baş məşqçisi Jorje Jezuşla bu barədə danışmayıb.
Məlumata görə, Ronaldu noyabrın 6-da açıqlanacaq heyətə dəvət alacağını əvvəlcədən bilib. Jezuş təcrübəli futbolçunun yığmaya hələ də fayda verə biləcəyini düşünür və onu UEFA Millətlər Liqasının qarşıdakı iki oyunu üçün heyətə çağırmağı planlaşdırıb.
Lakin portuqaliyalı ulduz Jezuşun rəhbərliyi altında milliyə qayıtmaq istəmədiyindən qərarını heyət açıqlanmazdan bir gün əvvəl elan edib.
Bildirilir ki, Ronaldu ilə baş məşqçi sonuncu dəfə sentyabrın 30-da danışıblar. Həmin gün futbolçu, Jezuş və Proensa arasında görüş keçirilib. Ronaldu daha sonra milli komandanın düşərgəsini tərk edib. O vaxtdan tərəflər arasında heç bir danışıq olmayıb.
Bu səbəbdən futbolçunun yığma karyerasını başa vurması baş məşqçi üçün gözlənilməz olub.
Nə Jezuş, nə də Proensa Ronaldunun milli komandadan bu şəkildə ayrılmasını istəyib. Lakin onlar hücumçunu qərarından döndərə bilməyiblər. Nəşrin məlumatına görə, Ronaldu Portuqaliya millisindəki karyerasını ehtiyat oyunçu kimi deyil, əsas heyət üzvü statusunda başa vurmaq istəyib.
Bu qərarla Ronaldu karyerasındakı 1000-ci qolu Portuqaliya millisinin formasında vurmaq arzusundan da imtina edib. Bununla belə, təcrübəli hücumçu həmin göstəriciyə çatana qədər klub səviyyəsində çıxışını davam etdirmək niyyətindədir.
Qeyd edək ki, Ronaldu sentyabrın 30-da milli komandanın düşərgəsini tərk etdikdən sonra yığmanın heyətində meydana çıxmayıb. Onun Jezuşla fikir ayrılığı Norveçlə UEFA Millətlər Liqası görüşündə ehtiyatda qalmasından sonra yaranıb.
