Idman.biz
Səudiyyə Ərəbistanının "Əl-Nəsr" futbol komandasının hücumçusu Kriştiano Ronaldu İngiltərənin "Mançester Yunayted" klubunun sabiq baş məşqçisi Erik ten Haqın onun haqqında səsləndirdiyi tənqidlərə münasibət bildirib.
İdman.Biz "Sport Bild" nəşrinə istinadən xəbər verir ki, 41 yaşlı portuqaliyalı futbolçunun reaksiyasını britaniyalı jurnalist Pirs Morqan "Football Uncensored" verilişində açıqlayıb.
Morqanın sözlərinə görə, Ronaldu keçmiş məşqçisinin fikirlərinə əhəmiyyət vermədiyini bildirib.
"Mən Kriştianodan bu barədə soruşdum. O isə ten Haqın haqqında danışmağa dəyməyən biri olduğunu söylədi", - deyə jurnalist bildirib.
Qeyd edək ki, niderlandlı mütəxəssis bir müddət əvvəl Ronaldunun "Mançester Yunayted"dəki ikinci dövrünü tənqid edib. O, portuqaliyalının artıq əvvəlki səviyyədə çıxış edə bilmədiyini söyləyib.
"Şübhəsiz, Kriştiano dünyanın ən yaxşı futbolçularından biridir. Amma reallıq budur ki, o, son yeddi-səkkiz ildə gözlənilən səviyyədə çıxış edə bilməyib. "Yuventus"dan sonra hər şey bitdi", - deyə ten Haq bildirib.
Morqan isə Ronaldunu müdafiə edərək onun "Mançester Yunayted"dəki son tam mövsümündə İngiltərə Premyer Liqasında 18, UEFA Çempionlar Liqasında isə altı qol vurduğunu xatırladıb.
Jurnalist hesab edir ki, portuqaliyalı hücumçu komandada daha iki-üç il qalaraq çoxlu qol vura bilərdi. Onun fikrincə, ten Haq futbolçuya hörmətsiz münasibət göstərib.
Xatırladaq ki, Ronaldu ilə ten Haq arasındakı münasibətlər 2022-ci ildə ciddi şəkildə gərginləşib. Portuqaliyalı futbolçu həmin ilin noyabrında Morqana verdiyi müsahibədə baş məşqçiyə hörmət etmədiyini və klub tərəfindən xəyanətə uğradığını bildirib. Bundan sonra "Mançester Yunayted" onunla müqaviləyə qarşılıqlı razılıq əsasında xitam verib.
