Idman.biz
İspaniyalı yarımmüdafiəçi Kristian Tello Birləşmiş Ərəb Əmirliklərinin ikinci divizion təmsilçisi "Palm Siti" klubuna transfer olunub.
İdman.Biz xəbər verir ki, bu barədə ərəb klubu sosial şəbəkə hesablarında məlumat yayıb.
"Palm Siti" hazırda ölkə çempionatının yüksək liqasına vəsiqə qazanmaq uğrunda mübarizə aparır. Rəhbərlik Tellonun təcrübəsinin bu məqsədə çatmaqda komandanın xeyrinə olacağına inanır.
"Barselona" və "Espanyol" akademiyalarının yetirməsi olan 33 yaşlı futbolçu karyerası ərzində "Portu", "Fiorentina", "Betis", "Los-Anceles" (MLS), eləcə də Səudiyyə Ərəbistanının "Əl-Fateh" və "Əl-Uruba" klublarının formasını geyinib.
Qeyd edək ki, Tello "Barselona" ilə İspaniya çempionluğu, Kubok və Superkubok qazanıb, "Betis"lə İspaniya Kubokunun, "Los-Anceles"lə isə MLS çempionluğunun və müntəzəm mövsümün qalibi olub.
