Kristian Avram: "Uduzan təkcə qapıçı və ya müdafiəçilər deyil, komandanın özüdür"

"Komandamızın xarakteri var, məğlubiyyətdən düzgün nəticələr çıxaracağıq".

İdman.biz Teleqraf-a istinadən xəbər verir ki, bunu "Araz-Naxçıvan"ın qapıçısı Kristian Avram evdə Kipr "Omoniya"sına 0:4 hesabı ilə uduzduqları UEFA Konfrans Liqasının III təsnifat mərhələsinin ilk oyunundan sonra jurnalistlərə açıqlamasında deyib.

"Mən riyaziyyatçı və ya statistik deyiləm, amma əminəm ki, düzgün bərpa olunmalı və baş məşqçi heyəti ilə birlikdə meydana çıxıb iradəmizi göstərməliyik. Baş verənlər xoş olmasa da, həyat bununla bitmir", - deyə moldovalı qolkiper vurğulayıb.

Son oyunlarda rəqibin oyun tərzini izlədiklərini və analiz etdiklərini vurğulayan 31 yaşlı oyunçu qeyd edib ki, keçmişə baxmaq artıq mənasızdır: "Yüz il əvvəl olanlara baxmağın artıq mənası yoxdur, həm onların, həm də bizim komandamızda çox dəyişiklik baş verib. Oyun tərzləri fərqli olduğundan keçmişə baxmaq bizə kömək etməz."

Müdafiədəki problemlərlə bağlı sualı cavablandıran Avram əlavə edib: "Dörd top buraxdıq, müdafiədə problemlər var idi. İndi emosional vəziyyətdə qiymətləndirmək çətindir. Anlamalı və analiz etməliyik ki, nə baş verib, səbəbləri nələrdir. Qol buraxırıqsa, bu, təkcə müdafiə və qapıçı problemi deyil. Bütün oyunu analiz edib, gələcəkdə belə halların olmaması üçün iş görməliyik. Uduzan təkcə qapıçı və ya müdafiəçilər deyil, komandanın özü olur. Biz hamımız birlikdə meydana çıxır və məsuliyyət daşıyırıq".

İdman.biz