Idman.biz
Portuqaliya millisinin və Səudiyyə Ərəbistanının "Əl-Nəsr" klubunun hücumçusu Kriştianu Ronaldu yığmadakı çıxışını başa vurduğunu açıqlayıb.
İdman.Biz xəbər verir ki, 41 yaşlı futbolçu bu barədə sosial şəbəkə hesabında paylaşdığı vida videosunda bildirib.
O, milli komandanın 7 nömrəli formasını gələcək nəslə təhvil verməyin vaxtının çatdığını vurğulayıb.
"Bu, asan qərar olmadı. Çünki bəzi qərarlar yalnız ağılla deyil, həm də ürəklə verilir. 2003-cü ilin avqustunda başlayan və həyatımı əbədi dəyişən bir yol başa çatır", – deyə Ronaldu bildirib.
Portuqaliyalı ulduz milli komandada keçirdiyi 23 il ərzində qazandığı uğurlardan, yaşadığı çətinliklərdən və komanda yoldaşlarından söz açıb. O, bu müddətdə Portuqaliyanı təmsil etməkdən həmişə qürur duyduğunu qeyd edib.
Ronaldu ailəsinə, məşqçilərə, komanda yoldaşlarına və milli komandanın fəaliyyətində iştirak edən bütün əməkdaşlara təşəkkür edib.
"Bu gün milli komandanın heyətində meydana çıxdığım yolumu başa vururam. Başımı dik tutaraq, keçdiyim yolla fəxr edərək və Portuqaliya üçün əlimdən gələni etdiyimi bilərək ayrılıram. Amma heç vaxt sizlərdən biri olmaqdan vaz keçməyəcəyəm", – deyə futbolçu əlavə edib.
O, vida müraciətini "7 nömrəli forma qalır. Onu geyinmiş olmağın qüruru isə həmişə mənimlə olacaq. Portuqaliya hər zaman qəlbimdə olacaq" sözləri ilə yekunlaşdırıb.
Qeyd edək ki, Kriştianu Ronaldu 2003-cü ilin avqustunda Portuqaliya millisində debüt edib. O, yığmanın heyətində 234 oyun keçirib və 146 qol vurub. Futbolçu Portuqaliya ilə 2016-cı ildə Avropa çempionatının, 2019-cu ildə isə UEFA Millətlər Liqasının qalibi olub.
View this post on Instagram
