Idman.biz
Fransa millisinin futbolçusu İbrahima Konate cüdoçu Teddi Rinerin ölkə prezidentliyinə mümkün namizədliyi və peşəkar idmançıların ictimai müzakirələrdə rolu barədə danışıb.
İdman.Biz "Foot Mercato"ya istinadən xəbər verir ki, Konate Rinerlə bağlı məsələdən kifayət qədər məlumatlı olmadığını söyləyib:
"Bu sualı mənə əvvəllər də veriblər. Heç nə görməmişəm, ona görə də həqiqətən məlumatım yoxdur. Onun kostyumda fotosunu gördüm, amma məsələyə baxmağa vaxtım olmadı. Buna görə fikir bildirə bilmərəm".
Fransalı müdafiəçi idmançıların da vətəndaş olduqlarını və mövqelərini ifadə etmək hüququna malik olduqlarını vurğulayıb:
"Bu, çoxdan davam edən müzakirədir. Bilirəm ki, kiminsə xoşuna gəlir, kiminsə isə yox. Amma nəzərə almalıyıq ki, hər idmançının səsi var, hər idmançı vətəndaşdır. Fikrimizi bildirəndə müəyyən qədər imtiyazlı mövqedə oluruq, çünki bəzi məsələlər bizə yalnız uzaqdan təsir edir. Lakin futbolçu olaraq bu mövqeyə zəhmətlə və bir qədər də şans sayəsində gəldiyimizi unutmamalıyıq".
Konate şans amili olmasaydı, özlərinin də yaxınlarının yaşadığı çətinliklərlə üzləşə biləcəklərini qeyd edib:
"Şans amilini kənara qoysaq, qardaşlarımızın və ya dostlarımızın yerində ola bilərdik. Onların gündəlik həyatı bizimkindən fərqlidir. Özümüzü onların yerinə qoyuruq və elə vəziyyətlər var ki, hər gün onlarla yaşamaq çox çətindir. Buna görə düşünürəm ki, səsimiz vacibdir".
Müdafiəçi ictimai məsələlər barədə danışarkən məsuliyyətli yanaşmanın da zəruri olduğunu bildirib:
"Biz ilk növbədə futbol oynayırıq. Amma danışanda mövzuya düzgün yanaşmağı bacarmalıyıq. Sadəcə danışmaq xatirinə və ya müəyyən insanların xoşuna gəlmək üçün danışmamalıyıq".
