Qol.az
"Sıx oyun qrafikində çıxış etdiyimizə görə bugünkü matçda elə də dinamik oyun nümayiş etdirə bilmədik. Qarşıdakı günlərdə yaxşı istirahət edib çempionatın qalan oyunlarına hazırlaşacağıq".
QOL.az xəbər verir ki, bu sözləri "Araz-Naxçıvan"ın baş məşqçisi Elmar Baxşıyev Misli Premyer Liqasının 32-ci turunda "Səbail"lə 1:1 hesablı heç-heçə etdikləri oyundan sonra keçirilən mətbuat konfransında deyib.
O, sıx oyun təqviminin matça təsir etdiyini bildirib: "Qoldan sonra müdafiəyə çəkilməklə bağlı futbolçulara hansısa tapşırıq verilməyib. Qeyd etdiyim kimi, sıx qrafiklə əlaqədar onlarda da yorğunluq olur. Futbolçuların çıxışını kiçiltmək fikrimiz yoxdur. Əllərindən gələni etdilər. İnanıram ki, qarşıdakı oyunlarda daha məzmunlu, dinamik şəkildə çıxış edəcəyik".
Mütəxəssis turnir cədvəlindəki yerlərinin heç bir təzyiq göstərmədiyini qeyd edib: "3-cü yerlə bağlı hansısa təzyiq hiss etmirik. Çünki bura bu futbolçuların qazandıqları xallarla gəlmişik. Toparlanıb qalan oyunlarda da lazım olan nəticələri qazanacağıq. Biz komandanı rəqiblərin qazandıqları və ya itirdikləri xallara görə deyil, öz nəticələrimizə kökləyirik".
