Sport24.az
Almaniyanın "Nürnberq" komnandasının baş məşqçisi Miroslav Kloze azərbaycanlı futbolçu Mahir Emrelinin II Bundesliqanın 29-cu turunda "Kayzerslautern"lə matçda start heyətində yer alması ehtimalı barədə danışıb. Sport24.az "Bild"ə istinadən xəbər verir ki, mütəxəssis hər şeyin ola biləcəyini söyləyib:
"Onun keyfiyyəti var. Yenə hər şey açıqdır. Hər kəsin meydana çıxmaq şansı var".
Nəşr Klozenin məşq zamanı Emreli ilə fərdi söhbətlər etdiyini yazıb: "Baş məşqçi həmişə Emrelinin topla oynamasından narazıdır. Bu səbəbdən hər ikisi arasında davamlı mübahisə olur. Mahir mövsümün əvvəlində yaxşı oynadı, qışda getmək istədi və problem yaratdı. Bütün bunlara baxmayaraq yenidən komanda üçün önəmli oyunçu ola bilər. Onun yaydan sonra qalması çətin görünür. Müqavilə bitir, amma uzadılması variantı var. Lakin zədəli və cəzalı oyunçular olduğu üçün Klozeyə təcili hücumçu lazımdır. Emreli də klubdan müsbət təəssüratla ayrılmaq istəyər. Beləliklə, yeni klubların da diqqətini cəlb edə bilər. Bu fürsətdən istifadə edə biləcəkmi?"
Qeyd edək ki, aprelin 12-də keçiriləcək "Kayzerslautern" - "Nürnberq" matçı Bakı vaxtı ilə saat 22:30-da start götürəcək.
