Sport24.az
"Real" hücumçusu Kilian Mbappe La Liqanın 31-ci turunda "Alaves"lə matçda qırmızı vərəqə aldığına görə "Barselona" ilə İspaniya kubokunun final matçını buraxa bilər. Sport24.az xəbər verir ki, bu barədə Marca məlumat yayıb.
İspaniya çempionatının oyununda fransalı futbolçu "Alaves"in yarımmüdafiəçisi Antonio Blankonu baldır nahiyəsinə təpiklə vurduğu üçün birbaşa qırmızı vərəqə alıb. Buna görə onu diskvalifikasiya gözləyir.
Mbappenin neçə oyun cəzalanacağı ilə bağlı yekun qərar İntizam Komitəsinin iclasında müəyyənləşəcək. Hər şey matçın baş hakimi Sezar Soto Qradonun oyunun protokolunda nə yazmasından asılı olacaq. Fransalı forvardı 1-3 oyun arası cəza gözləyir.
Aprelin 26-da "Barselona" ilə keçiriləcək kubokun finalından əvvəl "Real" çempionatda "Atletik" və "Xetafe" ilə qarşılaşacaq.
Qeyd edək ki, Mbappe cari mövsümdə "Real"ın formasında meydana çıxdığı 47 matçda 32 qol vurub və 4 məhsuldar ötürmə edib.
