Sport24.az
Bu gün "Qarabağ" Çempionlar Liqasının III təsnifat mərhələsinin cavab oyunu çərçivəsində Bolqarıstanda "Ludoqorets"lə cavab oyununa çıxacaq. Razqradda baş tutacaq qarşılaşma ərəfəsində "süvarilər"in müdafiəçisi Kevin Medina Sport24.az-a müsahibə verib. "Kolumbiya tankı" "Ludoqorets"lə ikinci görüş barədə danışmaqla yanaşı, bizi maraqlandıran başqa sualları da cavablandırıb.
- Premyer Liqaya uğurlu start vermisiz. İki oyun və iki qələbə. Yeni mövsümlə bağlı fikirlərin maraqlıdı...
- Yaxşı toplanış keçdik. Bütün futbolçular təlim-məşq toplanışında maksimun gücünü ortaya qoydu. Yeni "futbol ili"ndə iki tur ardıcıl böyük hesablı qələbə qazanmağımız da məhz keçirdiyimiz toplanışın nəticəsidi.
- Premyer Liqadan fərqli, təəssüf ki, ötən həftə Çempionlar Liqasının III təsnifat mərhələsinin ilk oyununda "doğma divarlar" arasında "Ludoqorets"ə məğlub olduz. Yenilginin səbəbi nə oldu?
- Bakıdakı ilk oyunda əlimizdən gələni etdik. İstər dinamika, istər meydanda gedən mübarizədə biz rəqibdən üstün oynadıq. Amma görünən odur ki, oyunumuzda nəsə çatışmadı və məğlub olduq. Bolqarlarla matçla nəyin çatışmadığını baş məşqçimiz daha yaxşı bilir, bizə də nöqsanlarımızı göstərib. Bir şey dəqiqdir ki, bizi Bolqarıstanda ağır matç gözləyir. Komanda olaraq daha məsuliyyətli olub meydanda əlimizdən gələnin ən yaxşısını edib, Bakıya qələbə ilə qayıtmağı düşünürük.
- Məğlubiyyətdən sonra paltardəyişmə otağında Qurban Qurbanov futbolçulara nə dedi?
- Baş məşqçimiz bizə dəstək, motivasiya verdi. Qurban müəllim dedi ki, bu məğlubiyyətdən depressiyaya düşmək lazım deyil. Əksinə, gözlənilməz məğlubiyyətdən dərs çıxarıb səfərə nikbin yollanmalıyıq. O, hər birimizi qələbəyə köklədi.
- Cavab matçında qələbə qazanacağınıza əminsiz?
- Nəinki futbolda, həyatda da heç nəyə 100 faiz əmin olmaq mümkün deyil. Amma hamı bilsin ki, qələbə üçün son saniyədək nəinki mübarizə aparacağıq, yeri gəlsə, döyüşəcəyik.
- Üç ildi Azərbaycandasan, ölkəmizi necə xarakterizə edirsən?
- "İncil"də deyilən və kolumbiyalılar tərəfindən də tez-tez istifadə olunan bir ifadə var: "Heç kim öz torpağında peyğəmbər deyil". Sözüm odu ki, Kolumbiya vətənimdi, amma Azərbaycanı özüm üçün doğma ölkə hesab edirəm. Burda keçirdiyim illər ərzində demək olar kədərli, qəmli günlərim olmayıb. Əksinə, xoş vaxt keçirirəm. Azərbaycanlılardan da daim sevgi, qayğı, hörmət görmüşəm.
ABDULLA İSMAYILOĞLU
