Idman.biz
"Bu, həm onlar, həm də bizim üçün çox çətin oyun olacaq".
İdman.Biz bildirir ki, bu sözləri "Qarabağ"ın oyunçusu Kevin Medina İspaniyada "Atletik"lə UEFA Çempionlar Liqasının əsas mərhələsinin III tur oyunundan əvvəl təşkil olunan mətbuat konfransında deyib.
"Hazırlığımız yalnız Uilyams qardaşlarına qarşı deyil, bütövlükdə "Atletik" komandasınadır. Onlar klubun simalarıdırlar, amma biz təkcə onlara qarşı oynamırıq. Sabah bütün komandaya qarşı ciddi mübarizə aparmaq üçün hazırıq", - futbolçu bildirib.
Medina həmçinin ötən mövsümdəki çıxışından nəticə çıxardığını və bu mövsüm daha yaxşı formada olduğunu vurğulayıb: "Keçən mövsüm öz istədiyim səviyyədə deyildim və bu, mənim üçün böyük motivasiya oldu. Öz üzərində çox işlədim, psixoloji cəhətdən də daha güclü oldum. Hazırda əla hiss edirəm. İnsan səhvlərdən nəticə çıxarmalıdır və mən bu mövsüm əvvəlkindən daha yaxşıyam".
Qeyd edək ki, "Atletik" – "Qarabağ" matçı oktyabrın 22-də, Bakı vaxtı ilə saat 20:45-də başlayacaq.
