"Kəpəz"in tacikistanlı futbolçusu: "Təəssüf ki, "Səbail"lə oyunda tapşırığın öhdəsindən gələ bilmədik"

Təəssüf ki, "Səbail"lə oyunda tapşırığın öhdəsindən gələ bilmədik.

"Report"un məlumatına görə bunu "Kəpəz"in tacikistanlı futbolçusu Şervoni Mabatşoev klubun mətbuat xidmətinə açıqlamasında Misli Premyer Liqasının XXVIII turunda qarşılaşdıqları "Səbail"lə matçın nəticəsini dəyərləndirərkən deyib.

Futbolçu evdə qəlbə qazana bilmədiklərinə görə məyusluğunu dilə gətirib:

"Əvvəl də demişdim, indi də o fikirdəyəm ki, kimin qol vurmasının əhəmiyyəti yoxdur. Əsas olan komandanın qələbəsidir, azarkeşləri sevindirməyimizdir. Bakı klubu ilə eyni məqsəd üçün mübarizə aparırıq və turnir cədvəlində qonşuyuq. Evdə də oynadığımıza görə qələbə qazanmaq bizim üçün çox vacib idi. Təəssüf ki, tapşırığın öhdəsindən gələ bilmədik. Bunun əvəzini çıxmağa çalışacağıq".

24 yaşlı futbolçu növbəti turda qarşılaşacaqları "Sabah"la görüşə kökləndiklərini deyib:

"Səfərdə oynayacağıq. Əslində bütün matçlar bizim üçün evdən kənardadır. Turnir cədvəlində mövqeyimizi yaxşılaşdırmalıyıq. Ona görə bu qarşılaşmadan da uğurlu nəticə ilə ayrılmaq istəyirik. "Sabah" güclü rəqibdir. Oyuna yaxşı hazırlaşırıq. Məşqçilər lazımı tövsiyyələrini verirlər. Azarkeşlərimizi qalib gəlməklə sevindirmək istəyirik. Onların inamını yenidən qazanmalıyıq".

Qeyd edək ki, XXVIII turda baş tutan "Kəpəz" - "Səbail" matçı 1:1 hesablı bərabərliklə yekunlaşıb. Gəncə klubunun yeganə qolunu matçın 41-ci dəqiqədə məhz Ş.Mabatşoev vurub.