Idman.biz
"Kəpəz"in sabiq kapitanı Yeqor Xvalkonun futbolinfo.az saytına müsahibə verib.
İdman.biz xəbər verir ki, belaruslu müdafiəçi yenidən Azərbaycanda oynamağın əleyhinə deyil.
– 3 il formasını geyindiyiniz "Kəpəz"lə yollarınızın ayrılması gözlənilməz oldu…
– Klub mənimlə əməkdaşlığı davam etdirmək istəmədi. Səbəbini bilmirəm. Aramızda yeni müqavilə ilə bağlı danışıqlar olmadı, beləcə yollarımız ayrıldı.
– Karyeranızı harada davam etdirməyi planlaşdırırsınız? Yeni klubunuzun adı nə vaxt məlum olacaq?
– Harada oynayacağımı hələ bilmirəm. Buna konkret təklif aldığım zaman aydınlıq gələcək. Açığı, maraqlananlar çoxdur, ancaq konkret təklif hələ yoxdur.
– Sizi heyətində görmək istəyən Azərbaycan klubları varmı? Azərbaycanda qalmaq istərdiniz?
– Azərbaycandan heç kim mənimlə əlaqə saxlamayıb. Əlbəttə, təklif olsa, qalmaq istərəm. Azərbaycanı çox sevdim.
– Adil Şükürov sizə tanış simadır, artıq onun rəhbərliyi altında oynamısınız. Azər Bağırovun gedişi və Şükürovun "Kəpəz"ə qayıdışı sizin üçün gözlənilməz olmadı ki?
– Yox, bu, gözlənilməz olmadı. Azər Bağırovun gedəcəyini mövsümün son oyunundan əvvəl bilirdik.
– Gələn mövsümdə gəncəli azarkeşlər daha iddialı "Kəpəz" görmək istəyirlər. Qarşıdakı mövsümdə sabiq komandanızdan gözləntiniz nədir?
– "Kəpəz"dən ayrılsam da, sabiq komandama azarkeşlik edəcəyəm. Onlara uğurlar arzulayıram. Ümid edirəm ki, komanda qarşıya qoyulan tapşırığı yerinə yetirə biləcək.
– "Kəpəz" sizinlə yanaşı, son mövsümdəki heyətin əksər üzvləri ilə də yollarını ayırdı. Hazırda Adil Şükürov yeni komanda formalaşdırmaqdadır. Sizcə, heyətdəki bu qədər dəyişiklik "Kəpəz"ə necə təsir edəcək?
– Bilmirəm, "Kəpəz"də olduğum müddətdə də hər il heyət tamamən dəyişirdi. Əgər dərhal rəqabətə davamlı heyət qurulsa, düşünürəm ki, komanda turnir cədvəlinin orta yerləri uğrunda mübarizə apara bilər.
– Ümumilikdə Azərbaycandakı 3 illik karyeranızı necə qiymətləndirirsiniz?
– Mənim üçün möhtəşəm dövr idi. Futbolçu kimi inkişaf etdim, istənilən təzyiqə dözməyi öyrəndim. Bu, müsbət təcrübə oldu.
İdman.biz
