"Kəpəz"in keçmiş baş məşqçisi: "Komandanın Premyer Liqadan düşməyəcəyinə əmin idim"

"Kəpəz"in sabiq baş məşqçisi Adil Şükürov Gəncə klubunun Misli Premyer Liqasında yerini qoruyub saxlamasına münasibət bildirib.

Bu barədə"Report"a açıqlama verən mütəxəssis qərb təmsilçisinin elitanı tərk etməyəcəyini mövsümün əvvəlindən proqnozlaşdırdığını deyib.

"Mövsümün əvvəlindən əmin idim ki, komanda Premyer Liqanı tərk etməyəcək. Bizim vaxtımızda heyətə cəlb olunan futbolçular büdcəyə uyğun oyunçular idi. Lakin biz gedəndən sonra kluba qoşulan futbolçular müsbət mənada fərqlənirdilər. Mən "Kəpəz"lə vidalaşıb gedəndə demişdim ki, komandaya 4-5 yaxşı futbolçu alınmalıdır. Həmin oyunçular komandanın aparıcı üzvləri olmalı idilər və mənim dövrümdən sonra gələnlər elə də oldular".

O, son turlara qədər turnir cədvəlinin aşağı sıralarında amansız mübarizə getdiyini vurğulayıb:

"Gərgin mübarizəyə şahidlik etdik. Bütün "Kəpəz" azarkeşlərini təbrik edirəm. Dediyim oldu və buna görə sevinirəm. Mən, yaxud başqa baş məşqçi ilə fərq etməz, əsas odur ki, "Kəpəz" Premyer Liqada mübarizə aparacaq".

Qeyd edək ki, "Kəpəz"in Misli Premyer Liqasını tərk etməyəcəyi cari mövsümün başa çatmasına 2 tur qalmış dəqiqləşib. Bu, XXXIV turda "Səbail"in "Zirə"yə 0:1 hesabı ilə məğlub olmasından sonra gerçəkləşib. "Sarı-göylər" 32 xalla turnir cədvəlinin səkkizinci pilləsində qərarlaşıb. I Liqaya düşməsi rəsmiləşən "Səbail" isə 22 xalla sonuncudur.