"Kəpəz"in kapitanı: "Heç kim düşünmür ki, biz elitanı tərk edə bilərik"

"Məncə, yaxşı oyun alındı".

İdman.biz xəbər verir ki, bunu "Kəpəz"ın kapitanı Yeqor Xvalko klubun mətbuat xidmətinə açıqlamasında deyib.

Belaruslu müdafiəçi Misli Premyer Liqasının XXX turunda qarşılaşdıqları "Araz-Naxçıvan" ilə matçı şərh edib. 28 yaşlı futbolçu bildirib ki, qolsuz başa çatan görüşdə hər iki tərəfin qələbə qazanmaq üçün şansı olub: "Həm bizim, həm də rəqibin fərqlənmək üçün fürsətləri oldu. Qalib gələ və ya məğlub ola bilərdik. Turnir cədvəlinə baxsaq, nəticəni normal hesab etmək olar. Həmişə qələbə qazanmaq istəyirsən. Amma unutmayın ki, bunu rəqib də arzulayır".

Xvalko sonuncu pillədə qərarlaşan "Səbail"lə 8 xallıq fərqə baxmayaraq "sarı-göylər"in hələ elitada qalmaq tapşırığının öhdəsindən gəlmədiyini düşünür: "Qarşıda 6 oyun var. 8 xallıq fərqin olması yaxşıdır. Amma çempionat bitməyib. Daha çox xallar yığmaq lazımdır ki, Premyer Liqada yerimizi təmin edək. Turnir cədvəlində daha yuxarı pillələrə qalxa bilərik. "Sumqayıt" və "Şamaxı" ilə xal fərqimiz böyük deyil. İrəliyə baxmalıyıq".

Belaruslu legioner komandada özünəinam hissinin yüksək olduğunu qeyd edib: "Kollektivdə uşaqlar bir-birilərinə etibar edirlər. Heç kim düşünmür ki, biz elitanı tərk edə bilərik. Bu amil uğur qazanmaq üçün vacib xüsusiyyətlərdəndir. Əksinə, hamı yaxşı oyunlar, yuxarı yerlər haqqında fikirləşir. Bizim nəticələrimiz qış fasiləsindən sonra düzəldi. Bu, bizə yaxşı şeylər barədə düşünməyə səbəb yaradır".

Qeyd edək ki, "Kəpəz" Misli Premyer Liqasının XXXI turunda "Şamaxı" ilə qarşılaşacaq. Matç aprelin 20-də Şamaxı şəhər stadionunda keçiriləcək.

İdman.biz