Report.az
"Kəpəz"in yeni transferi Rati Ardazişvili "Report"a müsahibə verib. Gürcüstanlı futbolçu Gəncə klubuna keçidindən və uyğunlaşma prosesindən danışıb. O, Premyer Liqanın XIX turunda "Turan Tovuz" üzərində qazandıqları böyükhesablı (5:2) qələbəni və digər məqamları dəyərləndirib.
- "Kəpəz"ə keçidiniz necə baş tutdu?
- Bura gəlməmişdən öncə müəyyən qədər araşdırma apardım. Klubda peşəkarların çalışdığını gördüm və yaxşı münasibət hiss etdim. Ona görə "Kəpəz"dən gələn təklifi dəyərləndirdim. İnanıram ki, bu komanda ilə yaxşı işlər bacaracağıq.
- Azərbaycanı seçməyinizə nə səbəb oldu?
- Futbolda belə hallar olur. Amma əvvəlcədən harada oynayacağınızı müəyyənləşdirə bilməzsiniz. Zaman elə gətirdi ki, bu gün Azərbaycandayam. Hər şey anidən oldu. Çox xoşdur ki, "Kəpəz"in futbolçusuyam.
- Turnir cədvəlində son sıralarda qərarlaşan komandaya transfer olmaq sizi narahat etmir?
- Mən belə düşünmürəm. Çünki son oyunumuz da göstərdi ki, komanda yuxarı pillələrə yüksələ bilər. Düşünürəm ki, baş məşqçimizin tapşırıqlarını düzgün yerinə yetirə bilsək və son məqamlarda dəqiq oynasaq, "Kəpəz" Premyer Liqadakı yerini qoruyacaq. Hətta bir neçə pillə yuxarı qalxacağımızı da istisna etmirəm.
- Daha əvvəl Ukrayna, Qazaxıstan və Litva klublarında çıxış etmisiniz. Azərbaycanı bu ölkələrlə necə müqayisə edərdiniz?
- Düzgün vurğuladınız, bir neçə ölkədə olmuşam. Əslində adıçəkilən ölkələrin hər birində futbolçular daha çox fiziki hazırlığa üstünlük verirlər. Demək olar ki, hər 3 ölkənin futbol düşüncəsi eynidir. Azərbaycanda isə diqqətimi çəkən o oldu ki, hər bir oyunçu topla daha çox rəftar etməyi xoşlayır. Üstəlik, ölkənizdə futbolu çox sevirlər.
- Kollektivə uyğunlaşa bilirsiniz?
- Komandada yaxşı ab-hava var. Yoldaşlarımla birlikdə növbəti oyunlara hazırlaşırıq. Hiss edirəm ki, onların hər biri "Kəpəz"in uğur qazanması üçün çalışırlar. Düşünürəm ki, uyğunlaşma ilə bağlı problem yaşamayacağam.
- Misli Premyer Liqasında bir neçə gürcüstanlı futbolçu çıxış edir. Aralarında tanıdıqlarınız var?
- Xüsusi münasibətim olan yoxdur. Lakin Azərbaycan çempionatında gürcü oyunçuların mübarizə apardıqlarından xəbərdaram. Aralarında izlədiklərim də olub. Çalışqan və intizamlı futbolçulardır.
- XIX turda "Turan Tovuz"a 5:2 hesabı ilə qalib gəldiniz. Bu, "Kəpəz"in heyətində ilk matçınız idi. Görüş barədə nə deyə bilərsiniz?
- Turnir cədvəlindəki yerimizə baxanda, bu matçın bizim üçün çox vacib olduğunu bilirdim. Oyundan öncə komandama inanırdım. Çünki heyətdə yüksək potensiala malik futbolçular var. Çox şadam ki, qələbə qazana bildik. Debüt görüşümdə böyük hesabla qalib gəlmək sevindiricidir. Sübut edəcəyik ki, "Kəpəz" heç də zəif deyil. "Turan Tovuz"a 5 qol vura bilmişiksə, deməli, səhvsiz oynamışıq.
- "Turan Tovuz"la qarşılaşmanın sonlarında rəqib azarkeşlərlə aranızda gərginlik yaşandı. Orada dəqiq nə baş verdiyini izah edə bilərsiniz?
- Futbolda belə hallar olur. Video görüntülərdən də izləyə bilərsiniz. Mən yanlış heç nə etməmişəm. Təbii ki, rəqib azarkeşlər məğlub durumda olduqlarına görə narazılıq edirdilər. Onları başa düşürəm.
