Idman.biz
"Kəpəz" növbəti dəfə problemlə üzləşib.
İdman.Biz sport24.az-a istinadən xəbər verir ki, Gəncə təmsilçisinin baş məşqçisi Azər Bağırov Misli Premyer Liqasının XI turunda heyətlə bağlı seçimdə xeyli düşünməli olacaq.
Belə ki, "sarı-göylər" müdafiə mövqeyində aparıcı futbolçusunu itirib. Portuqaliyalı oyunçu Dieqo Verdaşka cəzalı duruma düşüb. Oyunçu artıq çempionatdakı ardıcıl dörd matçda da sarı vərəqə ilə cəzalanıb. O, növbəti turda "Sabah"la matçda meydana çıxa bilməyəcək.
"Kəpəz"dəki digər müdafiəçi Pedro Qomes isə Azər Bağırov baş məşqçi təyin olunandan sonra forma şansı əldə etməyib. Mütəxəssis onu heyətdə görmək istəmir. Digər müdafiəçi Adama Fofana isə I turda "Sumqayıt"la matçda (0:3) zədə alıb və hələ ki, sıraya dönməyib.
Komandanın problemi bununla da bitmir. "Kəpəz"in aparıcı futbolçusu Mahamadu Ba X turda "Neftçi"yə uduzduqları (1:5) matçın iştirak ərizəsində yer almayıb. Oyunçu yüngül zədə səbəbindən görüşü buraxmalı olub.
Qeyd edək ki, "Kəpəz" XI turda "Sabah"la noyabrın 9-da üz-üzə gələcək.
