Sport24.az
Misli Premyer Liqasında yeni mövsümə avqustun 15-də start veriləcəyi bilinsə də, bəzi klubların ev oyunlarını harda keçirəcəyi hələ müəyyənləşməyib. Sport24.az-ın əldə etdiyi məlumata görə, "Kəpəz" və "Turan Tovuz" bu yöndə qeyri-müəyyənlikdir.
Gəncə təmsilçisinə yaxın mənbədən redaksiyamıza ötürülən bilgiyə əsasən, "sarı-göylər" stadion axtarışına çıxsalar da, hələ ki, istədiklərinə naiul ola bilməyiblər. Qazonunun dəyişdirilməsi gündəmdə olan Tovuz klubu da eyni aqibəti yaşayır.
Hazırda stadionunda təmir işləri gedən "Karvan"ın da mövsümün əvvəlində "sürgün" həyatı yaşayacağı bildirilir. Mənbəmizin sözlərinə inansaq, Yevlax stadionunun örtüyünün dəyişdirilməsi 2025/26 "futbol ili"nin startına qədər yekunlaşmayacaq. Bu üzdən yevlaxlılar da ilk turları "doğma divarlar"dan kənarda keçirmək məcburiyyətindədir.
Yeni mövsümdən etibarən elitada mübarizə aparacaq "İmişli"nin isə stadionu hazır olanadək ev oyunlarını "ASCO Arena"da keçirəcəyi demək olar ki, həllini tapıb.
