"Kəpəz": Heyətdən çox rəhbərliyin komplektləşməsi

Replika

"Kəpəz" yeni mövsümə ciddi hazırlaşır. Hətta deyərdim cox ciddi... O qədər ciddi ki, heyətlə yanaşı, rəhbərlik də iki ayın içində yenidən komplektləşir. Sanki, 2025/26 "futbol ili"ndə meydana futbolçular yox, rəhbərlik çıxacaq... Premyer Liqanın digər təmsilçiləri heyətlərini, "sarı-göylər" isə rəhbərliyi formalaşdırır.  

Geridə qalan illərdə Azərbaycan futbolunda türklər demiş, nələr görüb, nələrlə qarşılaşmışıq. Bu üzdən baş verənlərə, yaşananlara çox da təəccüblənmirik. Ancaq gəlin səmimi olaq, "Kəpəz" bunu bacarır.

Artıq tarixin yaddaşına köçmuş "Bakılı" klubunu və onun qeyri-adi açıqlamaları ilə tanınan Misir Əbilov adlı prezidentinini yəqin ki, xatırlayırsız. Həmin Misir müəllim bir dəfə həmkarlarıma açıqlamasında baxışa yeni baş məşqçi dəvət etdiklərini bildirmişdi. O vaxt Əbilovun bu sözləri gündəm olmuş, idman mediasında çox müzakirə edilmişdi. Həmin söhbətin üstündən xeyli vaxt keçsə də, bəzi klublarımız, daha dəqiq desək, "Kəpəz" deyəsən, eyni cığırla gedir.

Mayda klubun İdarə Heyətinin sədri postuna keçən Namiq Qədirov adlı futbol camiəsinə çox da tanış olmayan biri heç iki ay keçəməmiş vəzifəsindən getdi. Ola bilsin, Namiq bəy çoxtərəfli oyunda ümidləri doğrultmadığına görə, Fransaya dönəsi oldu. Qədirovun gedişi ortaya çoxlu suallar çıxarsa da, heç kim özünə əziyyət verib yaşananlara aydınlıq gətirmədi. Deyən olmadı ki, niyə gəldi və niyə getdi...

Başa vurduğumuz həftə klubun mətbuat xidməti Gəncə təmsilçisinin strukturunda dəyişikliyin olduğu barədə açıqlama verməklə yadda qaldı. Yenilərin tutduqları postda nə qədər duruş gətirəcəklərini deyə bilmərəm. Ancaq görünən odur ki, "sarı-göylər" yeni mövsümə çox ciddi hazırlıq görür.

Klubun fəaliyyətinə cavabdehlik daşıyanlar düşərgəyə Afrikadan bir təyyarə futbolçu dəvət edir, A komanda ilə yanaşı, əvəzedici heyəti gücləndirir, akademiyada radikal islahatlar gerçəkləşdirir. Əsas odur ki, "iş gedir" görüntüsü yarada bilirlər. Ancaq bu "işlərin" klubun işinə yarayıb-yaramayacağını söyləmək çətindir.

P.S. "Kəpəz" yeni mövsümdən "Kappa" firmasının istehsal etdiyi idman geyimləri ilə təhciz olunacaq ki, bu da klubda çox ciddi işlərin getdiyini göstərir.