Sport24.az
"Karvan'ın baş məşqçisi Kənan Kərimovun Sport24.az-a müsahibəs verib.
- Azərbaycan I Liqasının XV turunda "Cəbrayıl"la matçda qələbə qazana bilmədiniz. Xal itkisinin səbəblərini nədə görürsünüz?
- Komandamın oyunundan razı qalmadım. Qarşılaşmaya da istədiyimiz kimi başlamadıq. Ümumən götürəndə I Liqadakı rəqiblərin hər biri çətindir. "Qəbələ" istisna olmaqla, bütün komandalar 3 xalı çətinliklə əldə edirlər. Heyətimizdə itkilər mövcuddur. Zədəli və xəstə olan oyunçularımız var. Bununla belə, "Cəbrayıl"la matçda futbolçularımdan tamam başqa oyun gözləyirdim. Rəqib komanda da layiqli mübarizə apardı. Hesabda 1:0 öndə olsaq da, 90+5-ci dəqiqədə qapımıza gözlənilmədən penalti təyin olundu. Düşünürəm ki, həmin penalti verilməyə də bilərdi.
- Həmin epizodun təkrarını görmək mümkün deyil. Sizin olduğunuz mövqedən penalti epizodu necə görünürdü, ayağa müdaxilə var idi?
- Futbolçumuz hiss edirdi ki, rəqib oyunçu özünü yerə atmaq istəyir. Belə olan halda, dərhal ayaq saxlayır. Lakin rəqib futbolçu ayağını ilişdirir və özünü yerə atır. Məncə, həmin epizodda penalti verilməməli idi.
- Hazırda "Karvan" 30 xalla turnir cədvəlinin ikinci sırasında qərarlaşıb. Cari mövsüm hədəfləriniz nədən ibarətdir?
- Qarşıda bizi 13 tur gözləyir. Hələ mövsümün əvvəlində ilk "üçlüy"ə düşmək uğrunda mübarizə aparacağımızı demişdim. Hazırda ikinci sırada yer almışıq. Ən pis halda mövqeyimizi qorumağa çalışacağıq.
- Premyer Liqada komanda sayının artılıması xəbərinə reaksiyanız necə oldu?
- Bu, çox sevindirici və müsbət qərardır. I Liqadan Premyer Liqaya birdən-birə 3 komandanın yollanması müsbət haldır. Düşünürəm ki, bu amil Azərbaycan futbolunun inkişafına xidmət edəcək. Hazırda biz I Liqanın oyunlarını düşünürük.
- I Liqadan Premyer Liqaya 3 komandanın yüksəldilməsi necə?
- Əlbəttə, ədalətli idi. Artıq bu barədə bir neçə mütəxəssis də öz fikirlərini bildirib. Çünki ardıcıl iki il Premyer Liqada sonuncu yerləri tutan "Şamaxı" və "Qəbələ" I Liqaya "yuvarlandı". Ona görə indi də axırıncı pillədə qərarlaşan komanda aşağı divizona düşməli idi. Hamı əziyyət çəkir. Ona görə düşünürəm ki, qərar ədalətli idi.
- Bildiyiniz kimi, yeni mövsümdən Premyer Liqada legioner limitinin ləğvi qərarı da qüvvəyə mindi. Bu qərar az büdcəli komandalara nə kimi mənfi təsir göstərəcək?
- Biz Premyer Liqaya vəsiqə qazanmamışıq. Əgər nə vaxtsa elitaya çıxsaq, bu sualı o zaman ünvanlayarsınız.
- Ümumiyyətlə, legioner limitinin ləğv olunması qərarını necə qarşılayırsınız?
- Orda bəzi qaydalar mövcuddur. Çox sayda legioner futbolçu transfer etmək istəyən klublar müəyyən qədər ödəniş etməlidirlər. İnanmıram ki, klubların heyətində azərbaycanlı futbolçular yer almasın. Bu mümkünsüz bir şeydir. Təbii ki, bunu zaman göstərəcək. Məncə, güclü futbolçular lazım gəldikdə yenə meydana çıxacaqlar.
