Idman.biz
"Abubakar kimi futbolçunun "Neftçi"yə transferi Azərbaycan çempionatında böyük fərq yaradacaq. Bu, "Neftçi" üçün son illərin ən uğurlu keçidi ola bilər".
Bu sözləri AZƏRTAC-a açıqlamasında Türkiyənin "Beşiktaş" klubunda 2021-2023-cü illərdə idman direktoru vəzifəsində çalışmış Ceyhun Kazancı deyib.
Onun sözlərinə görə, karyerasının ən yaxşı dövrünü "Beşiktaş"da keçirən Vensan Abubakar xarakterli futbolçudur:
"Portu" və "Beşiktaş" kimi yüksək səviyyəli klublarda oynayıb. Avropa təcrübəsinə malik oyunçudur. Onun "Beşiktaş"ın heyətində avrokuboklarda göstərdiyi performansa baxsaq, necə keyfiyyətli futbolçu olduğunu görərik. Belə bir oyunçunun Azərbaycan Premyer Liqasına gəlişi ümumilikdə ölkə futbolu üçün də faydalı olacaq. O, həm komanda yoldaşlarına, həm də gənc futbolçulara nümunə olacaq".
C. Kazancı bildirib ki, Abubakar son bir ildə istədiyi formada çıxış etməsə də, peşəkarlığı ilə seçilir:
"Hatayspor"da mövsüm onun üçün uğurlu alınmadı. May ayından bəri oynamırdı. Buna baxmayaraq, fərdi məşqlərlə formada qalmağa çalışırdı. Öz üzərində çox işləyir. Bunun nəticəsində karyerasında bu qədər irəliləyə bildi, böyük klublarda oynadı. "Beşiktaş"da çıxış etdiyi vaxtlarda komanda məşqləri bitəndən sonra belə, meydançanı tərk etmirdi, əlavə məşqlər edirdi. Eşitdiyimə görə, klubsuz qaldığı vaxtda da Kamerun millisinə dəvət alıb. Onun əsas məqsədi növbəti dünya çempionatında iştirak etməkdir. Yığmadakı yerini qorumaq üçün "Neftçi"də özünü ən yaxşı şəkildə göstərməyə çalışacaq".
Türkiyəli funksioner 33 yaşlı forvardın Azərbaycan çempionatının tempinə uyğunlaşa biləcəyini də söyləyib:
"Premyer Liqanın tempi çox yüksək deyil. Amma Abubakar Türkiyə Superliqası kimi sürətli çempionatda çıxış edib. Ona görə də "Neftçi"yə tez uyğunlaşacağını düşünürəm. Neçə qol vuracağını demək çətindir. Dünən "Neftçi"nin "Araz-Naxçıvan"la oyununun nəticəsinə baxdım. Maraqlıdır ki, "ağ-qaralar" çempionatda uduzmur, amma qələbə də qazana bilmir, çox vaxt oyunları heç-heçə ilə başa çatır. Amma Abubakarın gəlişi nəticələrə də birbaşa təsir göstərəcək".
Qeyd edək ki, "Portu" (Portuqaliya), "Əl-Nəsr" (Səudiyyə Ərəbistanı), "Beşiktaş" (Türkiyə) kimi klublarda forma geyinmiş V.Abubakarın son komandası Türkiyənin digər təmsilçisi "Hatayspor" olub.
