Idman.biz
"Biz bu gün 2 xal itirdik".
İdman.Biz bildirir ki, bu sözləri Misli Premyer Liqasının 8-ci turunda "İmişli" ilə oyundan sonra "Qəbələ"nin baş məşqçisi Kaxaber Tsxadadze deyib.
Oyun 2:2 hesabı ilə yekunlaşıb.
"Əslində biz bu mövsüm çox da səhv etmirik. Sadəcə etdiyimiz səhvlər həlledici olur, qolla nəticələnir. Bir az bəxtimiz də gətirmir. Elə komandalar var ki, çox səhv edirlər, amma qolla nəticələnmir. Bu gün də iki diqqətsizlik qola səbəb oldu. Güclənməyə ehtiyacımız var. Komandaya yeni oyunçular gələcək. Rəhbərliklə bu barədə danışığımız olub. Qışda mütləq heyətin gücləndirilməsinə ehtiyac var. Ehtiyatda oturan futbolçular 17-18 yaşlı gənclərdir. Heç bir matçda rəqibə oyun baxımından uduzmamışıq. Oyunun qırılma nöqtəsi "İmişli"nin futbolçusunun meydandan qovulmaması oldu", - baş məşqçi deyib.
Tsxadadze meydançanın durumundan da şikayət edib: "Ümid edirəm bu işə nəzarət edənlər nəzərə alacaqlar ki, belə meydançada futbol oynamaq olmaz. Digər tərəfdən meydanda əsl mübarizə getdi. Amma təbii ki, belə meydançada müasir futbol oynamaq çətindir".
