Kaxaber Tsxadadze: “Onlara azarkeşlik edirəm”

Dünən I Liqada baş tutan "Qaradağ Lökbatan" - "Qəbələ" qarşılaşmasından sonra qonaqların baş məşqçisi Kaxaber Tsxadadze Sport24.az-ın əməkdaşının suallarını cavablandırıb.

- Bu gün mövsümdə ilk qələbənizi darmadağınla qazandız. Oyunla bağlı təəssüratlarınız maraqlıdır...

- Təbii ki, qələbə qazanmaq, özü də böyük hesabla xoş oldu. Futbolçularıma göstərdikləri oyuna görə təşəkkür edirəm. Amma artıq bu oyunu unutmalı və irəli baxmalıyıq. Ümumiyyətlə, konsentrasiysanı itirmək olmaz. Üzərimizdə böyük təzyiq və məsuliyyət var. Bütün rəqiblərimiz bizə qarşı fərqli motivasiyayla oynayırlar. Bu bizim üçün nə qədər xoş olsa da, bir o qədər də məsuliyyət deməkdir. Odur ki, komanda hər turu finala bərabər kimi dəyərləndirməli və hər matçda son saniyələrə kimi mübarizə aparmalıdı.

- İlk turda doğma meydanda "Zaqatala"ya qalib gələ bilməməyinizin səbəbini nə ilə izah edərdiz?

- Həmin oyunu uğursuz adlandırmazdım. İlk tur olmasına rəğmən, oyun planında yaxşı performans sərgilədik. Sadəcə, qol çatmadı. Əlimizə düşən yüz faizli qol imkanlarından yararlana bilmədik. Bunun üzərində çalışırıq və çalışacağıq da. Həmçinin "Zaqatala" da xoş sözlərə layiqdir. Onlar bizi yaxşı analiz etməklə bərabər çox mübariz oyun sərgilədilər. 8 nəfərlə sıx müdafiə olunmaqla bizə boşluq vermədilər. Ola bilər ki, tam  komplektləşməməyimizin də müəyyən rolu var idi. Amma oyundan-oyuna artıracağıq. Heyətimizə yeni qoşulan oyunçular var və onlar şans qazandıqca arzu olunan formaya düşəcəklər.

- Yenə transferlər gözlənilir?

- Ötən mövsümü bizimlə keçirən Murad Musayev də yola bizimlə davam edəcək. Sadəcə, hələlik fərdi məşqlər edir. Amma bir aydan sonra sərəncamımda olacaq. Onun bizə qoşulması müdafiədə daha da güclənəcək. Əlavə transferlər barədə isə hələlik nəsə deyə bilmərəm. Zaman göstərəcək.

- Bu mövsüm çalışdırdığınız komanda I Liqada çıxış etsə də, heç şübhəsiz Premyer Liqanı da izləyirsiz. Bu iki birincilik barədə fikirlərinizi bilmək istərdik...

- Məşqçilik karyeram ərzində həmişə demişəm ki, aşağı liqalarda mübarizə aparmaq daha çətindir. Bunu Azərbaycanın I Liqasına da aid etmək olar. Bu çempionatı güclülər dəstəsindən fərqli və maraqlı edən cəhət odur ki, çempionluğa iddialı olanlar çoxdur. Yuxarıda da əbəs yerə demədim ki, komandalar bizə qarşı fərqli motivasiya ilə oynayırlar. Odur ki, bu il I Liqa gərgin və çox maraqlı keçəcək. Premyer Liqaya gəlincə, geridə qalan 6 tura nəzər yetirsək maraqlı oyunlara şahidlik etmişik. Əsas Kurban Berdıyevin rəhbərlik etdiyi "Turan Tovuz"u fərqləndirərdim. Rusiyalı mütəxəssis döyüşkən komanda  formalaşdırmaqla rəqiblərinə başağrısı olmağı bacarıb. Fikrimcə, onlar daha da artıracaqlar.

"Şamaxı" da xoş sözlərə layiqdir. O klub mənə həmişə əziz, doğma olub. Orda bir çox insanlar var ki, isti münasibətlərim bu gün də qalmaqdadır. Elə Kamran İsmayılovla mehriban dostluğumu vurğulayardım. Hazırda necə adlanmasından asılı olmayaraq Bakı "İnter"inin xələfinə simpatiyam var, onlara azarkeşlik edirəm. İnanıram ki, bu klub əvvəlki əzəmətini geri qaytaracaq. Bütün "Şamaxı" camiəsinə uğurlar arzu edirəm.

ABDULLA İSMAYILOĞLU