Kaxaber Tsxadadze: Gənc oyunçulara təcrübə lazımdır

"Qəbələ" Misli Premyer Liqasının 2-ci turunda doğma meydanda "Zirə"yə 1:2 hesabı ilə uduzub. Sport24.az xəbər verir ki, "qırmızı-qaralar"ın baş məşqçisi Kaxaber Tsxadadze oyundan sonra keçirilən mətbuat konfransında jurnalistlərin suallarını cavablandırıb:

- Çox gərgin oyun oldu. Bizə daha çox təcrübə lazımdır. 19-20 yaşlı uşaqlar inkişaf etməlidir. Oyundan-oyuna onlarda artım gözləyirik. Ümumi götürəndə yaxşı oyun oldu. Zamanla daha yaxşı olacağımıza inanıram. Əsas odur ki, meydanda oyunumuz görünürdü. Hesabda öndə olduğumuz zaman da qol vurmaq üçün imkanlarımız oldu. Həmin epizodları təcrübəsizliyə görə qola çevirə bilmədik. Növbəti matçlarda daha yaxşı oyun nümayiş etdirə biləcəyik.

- Qoldan öncə Nicat Əliyevə sərt etiraz etdiniz. Bundan sonra futbolçu fərqləndi. Məcazi mənada qolu siz vurduz, yoxsa Nicat?

- Nicat qolu özü vurdu. O, robot deyil ki, mən kənardan idarə edim. 

- Ehtiyat oyunçular skamyası kasaddır. Heyətin gücləndirilməsi gündəmdədir?

- Bəli, düz qeyd edirsiz, skamyada kasadlıq var. Bu işlə rəhbərlik məşğul olur. Biz əlimizdə olan heyətlə işləyirik. Əlbəttə ki, "Zirə" ilə müqayisə etsək, bizim imkanlarımız daha azdır. İstərdik ki, çoxlu oyunçularımız olsun.

- Demək olar ki, "Zirə" ustalıq səviyyəsinin hesabına qələbə qazandı?

- Ustalıq və təcrübəsizlik bir-birinə yaxın sözlərdir. Eşqin Quliyevin yerində təcrübəli futbolçu olsaydı, o qərarı verməzdi. Amma Eşqin çox perspektivli oyunçudur. Ona inanırıq. "Zirə"nin müdafiəçiləri sadə oynayırdılar. Bu da onların təcrübəli olduğunu göstərir. Bu gün futbolçular çox çalışdılar. Amma nəticə belə oldu. Həyat davam edir. Gənc oyunçuların özlərinə inamı olmalıdır. Gənclərlə işləməyə davam edib legionerlərdən də çox şey tələb etməliyik. "Zirə" uzun müddətdir bir yerdə çıxış edən komandadır. Rəşad Sadıqov da xeyli zamandır orada işləyir. Komanda 2 ildir avrokuboklarda iştirak edir.

- Hesabda öndə olduğunuz halda ilk yarıda 2 qol buraxdız. Bu, sizi narahat etmir?

- Sadə oynamalıyıq. Təcrübə qazandıqca hər şey düzələcək. Qolu özümüz yaratdıq. "Karvan-Yevlax"la matçda da öz qapımıza qol vurduq.