Sport24.az
Misli Premyer Liqasının I turunun "Karvan-Yevlax" – "Qəbələ" oyunundan (1:1) sonra qonaq komandanın baş məşqçisi Kaxaber Sxadadze jurnalistlərin suallarını cavablandırdı. Sport24.az xəbər verir ki, mütəxəssis əvvəlcə görüşlə bağlı fikirlərini bildirdi…
– Xeyli sayda qol imkanlarımız oldu. 3,4 yox, 6-7 fürsətimiz var idi. Oyunçularım yaxşı oynadı, hər birindən razıyam. Qol epizodlarımızı dəyərləndirə bilmədik və rəqib fərqləndi. Uşaqlar yaxşı çalışdılar. Sonradan meydana daxil olan oyunçular üçün zaman lazımdır ki, daha yaxşı olsunlar.
– Oyunun qırılma nöqtəsinin əvəzetmələr olduğunu düşünmürsünüz?
– Razıyam. Lakin sonradan meydana daxil olanlar da bizim oyunçularımızdır. Düzdür, gözlədiyimiz oyunu ala bilmədik. Məsələn, Quimbiyanın sürəti, texnikası var, ancaq bunu görmədik. İstənilən halda, komandadakı hər oyunçuya şans verməliyik ki, onları görək. İbrahim Sanqare komandaya yeni qoşulub və uyğunlaşması üçün vaxta ehtiyacı var.
– Start heyətdə ötən mövsümdən 6 oyunçu var idi. Bunun hansı mənfi və müsbət tərəfləri oldu?
– Yaxşı oyunçularımız var. Şahin, Eşqin, Nicat ötən mövsümün yaxşılarından olub. Onlardan razıyam. Komandada təcrübəli oyunçular var. Məsələn, Doni Massumo Azərbaycana gələnə qədər peşəkar oynamamışdı, ötən il çempionatda bombardir oldu.
– Premyer Liqa səviyyəsindədirlər?
– Burda oynayırlarsa, deməli, hə.
– Qarşınıza hansı hədəf qoyulub?
– Hədəf çempionatda mümkün qədər yuxarı yerlərdə olmaq və möhkəmlənmək. Aşağı liqadan gələn klub üçün "Qarabağ", "Zirə" kimi komandalara qarşı oynamaq çətindir. Məqsəd yerimizi qorumaqdır. Heç bir komandadan çəkinməyəcəyik.
– Hakimlikdən razı qaldız? Etirazlarınız oldu…
– Emosional durum idi. Hakimlərlə bağlı bir şey deyə bilmərəm. Bəzən elə bilirdim meydanda oynayıram.
– Qol vura bilməməyiniz rəqib qapıçının ustalığı ilə bağlı idi, yoxsa hücumçularınızın ustalığı çatmadı?
– Təcrübə çatışmazlığı oldu. Əsas odur ki, qol imkanları yarada bilirik. Sevinirəm ki, bu qədər fürsətlərimiz olur.
