Sport24.az
Misli Premyer Liqasının XIV turunun "Sumqayıt" – "İmişli" oyunundan (1:0) sonra qonaq komandanın baş məşqçisi Jorj Kaşkilya jurnalistlərin suallarını cavablandırdı. Sport24.az xəbər verir ki, mütəxəssis əvvəlcə görüşlə bağlı fikirlərini bölüşdü.
– İlk hissədə yaxşı oyun göstərə bilmədik. Ağır oyunlardan sonra fiziki problemlərimiz var idi. İlk hissədəki oyunu təhlil edəcəyik. "Sumqayıt" birinci yarıda üstün oynadı. İkinci hissədə dəyişiklik etdik və oyuna qoşulduq. Əvəzetmələr təsirini göstərdi. Keyfiyyət artdı, qol imkanları yaratdıq. 100 faizlik epizod da qaçırdıq. Futbol elə oyundur ki, şanslardan yararlanmaq lazımdır. Rəqibin qolu zamanı keyfiyyətsiz zərbə ilə gələn ötürmə oldu və hücumçu keyfiyyəti hesabına fərqləndi. Qoldan sonra hesabı bərabərləşdirməyə çalışdıq, şans qazandıq, amma penaltidən yararlana bilmədik.
– Əsas heyətinizdə bir yerli oyunçu var idi. Bu qədər legionerlə 9-cu yerdəsiniz. Onlar olmasaydı, necə olardı?
– Məşqçi olaraq, yerli və ya əcnəbi arasında fərq qoymuram. Rəqabətdə kim üstündür, onu oynadırıq.
– Oyunun sonlarında yaşanan mübahisə nə ilə bağlı idi?
– Hər iki komandada gərginlik oldu. Rəqibin texniki zonasındakılar özlərini yaxşı aparmadı. Futbolda belə hallar qəbul edilməzdir. Hər kəs özünü ələ almağı bacarmalıdır.
– Artıq üçüncü dəfədir, penalti qaçırırsınız. Bu, nəylə bağladır?
– Cavab tapmaq çətindir. Məşqlərdə penaltilər üzərində də işləyirik. Lakin oyundakı penaltilər fərqlidir. Son dəqiqələrdə penalti qaçırırıq. İbrahim "Sabah"la oyunda son dəqiqədə qol vurmuşdu. Bu gün isə qaçırdı. Futbolda belə hallar normaldır.
