Sport24.az
"Karvan-Yevlax" qış fasiləsində heyətinə legioner futbolçu qatmağı planlaşdırmır. Bu barədə Sport24.az-a bölgə təmsilçisinin baş məşqçisi Füzuli Məmmədov açıqlama verib.
48 yaşlı mütəxəssis Rauf Rüstəmli və Samir Abdullayevin transferini bitirdiklərini, daha bir-iki oyunçu ilə danışıqlar getdiyini vurğulayıb:
"Səid İranxanla yollarımızı ayırmışıq. Ola bilsin, daha 1-2 futbolçu komandanı tərk etsin. Gələnlər isə Rauf Rüstəmli və Samir Abdullayevdir. Yenə də transferlərlə bağlı danışıqlarımız gedir. Hazırda əsas diqqəti yerli futbolçulara yönəltmişik. Qış fasiləsində heyətə legioner oyunçu qatmağı planlaşdırmırıq".
Qeyd edək ki, "Karvan-Yevlax" 16 turdan sonra 6 xalla sonuncu-12-ci pillədə qərarlaşıb.
