Sport24.az
Premyer Liqanın XII turu çərçivəsində "Karvan-Yevlax" – "Kəpəz" matçında futbolda hər gün görmədiyimiz, daha dəqiq desək, Azərbaycan futbolunda görməyə adət etmədiyimiz qeyri-adi olay yaşandı. Bunu matçı istər tribunadan, istərsə də televizor qarşısında əyləşənlərin hamısı gördü. Görməyənlər isə mətbuat və sosial şəbəkələr sayəsində xəbərdar oldu.
Deməli, oyunun ilk hissəsində meydan sahiblərinin baş məşqçisi Azər Həşimov müdafiəçi Vüsal Məsimovu əvəzləmək istədi. Lakin Məsimov qərarla razılaşmayaraq meydanı tərk etmədi. Görüşün baş hakimi isə yaşananları kənardan izləyərək bir qədər səbr edib futbolçunun baş məşqçinin qərarını vecə almadığını görüncə, oyunu davam etdirdi.
Qarşılaşmadan sonra təşkil olunan mətbuat konfransında həmkarlarımdan biri yaşananlarla bağlı Azər bəyə sual ünvanlayıb. Kağız üzərində baş məşqçi isə "Araz-Naxçıvan"la oyunda Vüsalın zədəsi var idi. Bu gün özü köməkçilərimə demişdi ki, əvəzetmə olsun. Sonra dedi ki, yaxşıyam, dəyişməyin. İnanın ki, o sözü mənə deməyib. Vüsalın əvəzetmə istəməsini də mənə köməkçilər demişdilər. Ona görə anlaşılmazlıq oldu. Yüz faiz əmin olun. Heç bir problem yoxdur" - söyləməklə, guya, vəziyyətdən çıxmağa çalışıb.
Bu yerdə yadıma komediaxanadakı "nəzarətə, nəzarət" səhnəcəyi yadıma düşdü. Yəqin ki, həmin səhnəciyi çoxları izləyib, görməyənlərə isə xatırlatmaq istəyirəm ki, orda müdir əməkdaşlarından birinə "sən nə işlə məşğulsan" sualını ünvanlayır. Cavab isə belə olur: "mən nəzarətə nəzarət edirəm". İndi Yevlax klubunda da vəziyyət nə qədər gülməli də olsa eynidir.
Ölkədə futbolla maraqlananların 7-dən 77-yə hamısı bilir ki, Azər Həşimov özü də qeyri-rəsmi köməkçidir. Sənəd üzərində baş məşqçi olsa da, klubda bu funksiyanı adı ştatda vitse-prezident kimi keçən Kənan Kərimov yerinə yetirir. Məşqlərdə tapşırıqları Kərimov verir, kimin əsas heyətdə yer alacağını, kimin ehtiyatda qalacağını o, müəyyənləşdirir. Oyun vaxtı əvəzetmələr onun istəyinə uyğun reallaşır. Ümumiyyətlə, komandanın necə oynayacağı məhz Kənan bəyin istəyindən asılıdır. Həşimova isə sadəcə, Kərimovun tapşırlarını icra etmək qalır. Odur ki, onun ağızdolusu "köməkçilərim" deməsi, ictimaiyyətdə gülüş doğurur, özünü isə gülüş obyektinə çevirir. Təbii ki, bunu futbolçularda bilir və bəlkə də bu üzdən Azər bəyin qərarları onlar tərəfindən ciddiyə alınmır və bu alınacağı da inandırıcı görünmür. Odur ki, bu yerdə Azər bəyə bir atalar sözünü xatırlatmaq istəyirəm: "şəhərdə ikinci olunca, kənddə birinci olmaq daha yaxşıdır". Yəqin ki, Həşimov nə vaxtsa bunu başa düşəcək...
