Idman.biz
Uzun illər sonra Azərbaycan Premyer Liqasında çıxış edəcək "Karvan" klubunda hazırlıqlar davam edir. Yevlax təmsilçisi üzümüzə gələn "futbol ili"ndə iddialı olmaq niyyətindədir.
İdman.biz İdmanxeber.az-a istinadən xəbər verir ki, klub hazırda 9 əcnəbi futbolçu ilə danışıq aparır. Yaxın vaxtda oyunçularla rəsmi müqavilə imzalanacaq.
"Karvan"ın rəhbəri Şahmar Vəliyev komandanın növbəti mövsüm üçün hədəflərini də müəyyənləşdirib. O, klub rəsmilərinə və məşqçilər heyətinə iddialı komandan görmək istədəyini bildirib. Klub rəhbəri aran təmsilçisini autsayder kimi yox, 4-5-ci pillələr üçün mübarizə aparan klub kimi görmək istəyir.
Oyunları Yevlaxda keçirmək, azarkeşlərin dəstəyi ilə çıxış etmək rəhbərliyin əsas hədəflərindədir. Artıq bununla bağlı Şahmar Vəliyev lazımi tapşırıqları verib. O, komandanın ev oyunlarını keçirəcəyi 6 min azarkeş tutumuna malik Yevlax şəhər stadionunda təmir-bərpa işlərinin başlanmasına göstəriş verib.
Süni örtüklü meydança salınmaqla yanaşı, digər işlərin aparılması və arenanın UEFA standartlarına cavab verən səviyyəyə gətirilməsi planlanır. Əldə etdiyimiz daha bir məlumata görə, komanda üçün ölkəxaricindən avtobus da sifariş edilib. Yaxın günlərdə avtobusun ölkəmizə gətiriləcəyi gözlənilir.
Stadionun yanında yerləşən köməkçi meydançada da ciddi işlər görüləcək. Burada 3500 nəfərlik tribuna inşa ediləcək və təbii örtüklü meydança salınacaq. Eyni zamanda, paltardəyişmə və AFFA rəsmiləri üçün yeni otaqların tikilməsi, sanitar qovşaqlarının inşa edilməsi də nəzərdə tutulub. Rəhbərlik ehtiyat meydança yerləşən ərazidə yeni stadion tikməyi planlaşdırır.
Əsas komandanın çıxış edəcəyi arenada müasir işıqlandırma sisteminin quraşdırılması da gündəmdədir. Bundan əlavə, futbolçuların şəraitinin yaxşılaşdırılması məqsədilə iki mərtəbədən ibarət 60 nəfərlik yaşayış binası inşa edilib. Kür çayının sahilində yerləşən komandaya məxsus təlim-məşq bazasında da təmir işləri bitmək üzrədir. Baza daxilindəki futbol meydançası da süni örtüklə örtüləcək.
Qısacası, uzun illər sonra Premyer Liqaya qayıdan klub rəhbərliyinin ciddi hədəfləri var. Onlar elitada möhkəmlənmək və Yevlax futbolu üçün ciddi işlər görmək niyyətindədir.
İdman.biz
