Karlos Jatoba: "İkinci oyuna çıxanda ilk matçdakı nəticəni unutmalıyıq"

"Araz-Naxçıvan"ın futbolçusu Karlos Jatobanın Sport24.az-a müsahibəsi

- Azərbaycan Kubokunun yarımfinal mərhələsinin ilk oyununda "Qarabağ"ı 1:0 hesabı ilə məğlub etdiniz. Matçla bağlı nə deyə bilərsən?
- Çətin və yaxşı oyun oldu. Meydanda bərabər səviyyədə mübarizə getdi. Daha çox qol vurmaq üçün şanslarımız da var idi. Cavab matçına da ciddi hazırlaşmalıyıq. Həmin görüşdə də yaxşı oyun sərgiləmək niyyətindəyik.


- Rəqibin "Qarabağ" olması sizə əlavə motivasiya verirdimi?
- Əlbəttə. Bilirik ki, rəqibimiz Azərbaycanın ən böyük klubudur. Həmçinin Avropada da adından söz etdirib. Bu, yaxşı motivasiyadır. Biz də ciddi və güclü oynamağa çalışdıq. Əvvəlki üç matçda uduzsaq da, daha yaxşı mübarizə aparırdıq.


- "Araz-Naxçıvan" bu titula sahib çıxa bilərmi?
- Bəli. İkinci oyuna çıxanda ilk matçdakı nəticəni unutmalıyıq. Düşünməliyik ki, birinci qarşılaşma qolsuz başa çatıb.


- Komandanız 2025-ci ildə Premyer Liqada bir qələbə qazanıb. Səbəb nədə görürsən?
- Bizim üçün çətin perioddur. Mövsümün ilk yarısında çoxlu qalibiyyətimiz olub. Bu futboldur. Bəzən udursan, bəzən məğlub olursan. Əsas olan odur ki, komandamızda yaxşı keyfiyyətlərə malik oyunçular var. Növbəti matçlarda qələbə qazana biləcək və mübarizə apara biləcək gücdəyik.


- Hazırda çempionatda üçüncü pillədə qərarlaşmısınız. Mövsümün sonunadək bunu qoruyac biləcəksiniz?
- Əminəm ki, bunu bacaracağıq. Hər şey bizdən asılıdır. Çox çalışırıq. Hər matç bizim üçün finaldır.